ОХУ-ын ерөнхийлөгч Владимир Путин орон нутгийн цагаар 17-ны өдөр Европын орнууд ОХУ-ын нийлүүлдэг эрчим хүчний нөөцөөс бүрэн ангижрах боломжгүй хэрнээ Америкийн шахалтаар газрын тосны салбарт хориг тавихаар оролдож байна хэмээн хэлсэн байна.

Риановости агентлагийн мэдээлснээр, Путин мөн өдөр өөрийн орны газрын тосны салбарын хөгжлийн талаарх цахим хурал дээр энэхүү мэдэгдэлийг хийсэн байна.

"Европын орнууд бүхэлдээ АНУ-ын шахалт дор газрын тос, байгалийн хийн салбарыг хамарсан улс төрийн шинж чанар бүхий шинэ хориг арга хэмжээг авах талаар хэлэлцсээр байгааг бид харж байна" хэмээн тэрээр мэдэгдэв.

Тэрээр үргэлжлүүлэн “Европын орнууд Оросын эрчим хүчний нөөцөөс бүрмөсөн татгалзаж чадахгүй гэдгээ шулуухан хэлсээр байна. Түүгээр ч зогсохгүй ОХУ-ын эрчим хүчний нөөцөөс ихээхэн хамааралтай Европын холбооны зарим орнууд ойрын хугацаанд лав манай орны газрын тосноос ч татгалзаж чадахгүй” гэдгийг хэлжээ.

“Барууны улстөрчид, эдийн засагчид эдийн засгийн хамгийн наад захын хуулиудаа мартчихав уу эсвэл зориудаар өөрсдийгөө эрсдэлд оруулж, түүнийгээ үл тоомсорлохоор хичээж байгаа хэрэг үү” хэмээн цааш үргэлжлүүлэв.

ОХУ-аас газрын тос, байгалийн хий импортлох нь эдийн засгийн хувьд хамаагүй ашигтай байхад улс төрийн шалтгаанаар өөрсдөө алдагдал хүлээж байгаагаа мэдэхийн дээдээр мэдэж байгаа ч эрчим хүчний нөөцөд хориг тавихаар улайрч байгааг мөн онцлон дурдсан байна.

Барууны орнуудын зүгээс ОХУ-ын эсрэг авсан хориг арга хэмжээ болон одоо хэлэлцэж буй газрын тосны хоригийн асуудал зэрэг нь олон улсын зах зээлд газрын тосны үнэ өсөхөд нөлөөлсөн бөгөөд эрчим хүчний үнийн өсөлт нь Европ дахь тээвэр, аж үйлдвэрлэл, хэрэглээний үнэд сөргөөр нөлөөлж байгааг тэрээр цохон тэмдэглэжээ.

Ерөнхийлөгч Путин “Барууныхан эрчим хүчний салбар дахь бүтцийн алдаагаа нуун дарагдуулах гэж эрчим хүчний үнийн өсөлт, бүх зүйлийн хариуцлагыг Орост үүрүүлэхийг хичээж байна” хэмээн сэтгэгдлээ илэрхийлсэн байна.

Эх сурвалж: Yonhap