Энэ удаагийн Азийн цомын тэмцээнийг зохион байгуулагч улс болох Катарын шигшээ баг хагас шигшээ тоглолтод Ираны багийг ялснаар /3:2/ финалд шалгарлаа.
Маш ширүүн өрсөлдөөн дунд өрнөсөн уг тоглолтын 4 дэх минутанд Ираны багийн тоглогч Сердар Азмун Катарын хаалганд бөмбөгийг оруулав. Удалгүй 17 дахь минутад Катарын шигшээ багийн Жасер Габер Абдулсаллам хариу гоолыг хийлээ. Нэгдүгээр үеийн төгсгөлд буюу тоглолтын 43 дахь минутанд Акрам Афиф техник сайтай, оновчтой цохилтыг хийж гоолдсоноор Катарын баг 2:1-ээр давамгайлж эхлэв.
Хоёрдугаар үе эхлээд төдий удалгүй тоглолтын 51 дэх минутанд Ираны багийн ахлагч Алиреза Яханбакш торгуулийн цохилтыг амжилттай гүйцэтгэснээр тооны харьцааг тэнцүүлж чадлаа. Харин хоёрдугаар үе дуусахаас 7 минутын өмнө Катарын багийн Али Алмоез гоолдсоноор тооны харьцааг 3:2 болгосон юм.
Хэдийгээр нэмэлт цаг хангалттай байсан боловч Ираны хөлбөмбөгчид боломжийг ашиглаж чадсангүй. Үүний сацуу Катарын баг тооны харьцааг улам холдуулах хоёр сайхан боломжийг алдлаа.
Одоо 10-ны өдөр болох шувтаргын тоглолтод Катарын шигшээ баг финалд анх удаа шалгарсан Иорданы хөлбөмбөгчидтэй Азийн цомын тэмцээний аваргын төлөө өрсөлдөнө.
Ташрамд дурдахад, Катарын хөлбөмбөгчид 2019 онд тус тэмцээний аваргаар шалгарч байсан юм.
Эх сурвалж: Кабар /МОНЦАМЭ агентлаг/