Италийн нэрт зураач Леонардо да Винчигийн алдарт бүтээл Мона Лизагийн хөргийг Луврын музейд тусгай өрөөнд байрлуулахаар төлөвлөж байна гэж тус музейн захирал Лоранс де Кар бямба гарагт мэдэгджээ.

"Ингэснээр зөвхөн Мона Лизагийн хөрөг зургийг л харахаар Луврын музейд зочилж буй хүмүүст уг бүтээлийг илүү сайн үзэж сонирхох боломж бүрдэнэ" гэж тэрбээр "Франс Интер" радиод ярилцлага өгөх үеэрээ хэлсэн байна. Луврын музей Соёлын яамтай боломжит шийдлүүдийн талаар хэлэлцэж байгаа ажээ.

Дэлхийн хамгийн алдартай музей болох Луврын музей 2023 онд есөн сая орчим зочин хүлээн авчээ. Л.Карын хэлснээр тэдний 80 хувь нь буюу өдөрт 20 мянган хүн Мона Лизагийн нууцлаг инээмсэглэлийг харахаар ирдэг бөгөөд ихэвчлэн уг зургийн өмнө зургаа авхуулдаг байна.

Мона Лизагийн хөрөг нь одоогоор Луврын музейн хамгийн том танхимд шилэн хоргонд хадгалагдаж буй юм. Тус танхимд мөн 16 дугаар зууны үеийн Венецийн мастеруудын бүтээлүүд байдгаас гадна Паоло Веронезегийн "The Wedding at Cana" нэртэй бүтээл өлгөөтэй байдаг. "The Wedding at Cana" нь Луврын музей дэх хамгийн том зураг юм.