Украины Харьков мужийн хэд хэдэн тосгонд тулаан болж байгаа талаар тус улсын Ерөнхийлөгч Владимир Зеленский ням гарагт мэдээлжээ.

Тэрбээр дүрс бичлэгээр ээлжит мэдэгдлээ хийхдээ, Донецк мужийн зарим газруудад ширүүн тулаан болж байгааг мөн мэдээлсэн байна.

В.Зеленскийн хэлснээр, Харьков мужийн фронтын томоохон хэсгүүдэд “хамгаалах тулаан” үргэлжилсээр байгаа бөгөөд өнгөрөгч баасан гарагт Оросын цэргүүд хуягт техникийн хүчээр өргөн цар хүрээтэй давшилтын ажиллагааг явуулж эхэлжээ.

"Саарал бүсээс дайны бүс болон хувирсан тосгод бий. Тэдгээрийн заримд нь эзлэн түрэмгийлэгчид байрлалаа бэхжүүлэхийг оролдож байгаа бол заримыг нь давшилтаа үргэлжлүүлэхэд ашиглаж байна" гэж Украины Ерөнхийлөгч хэлэв. Донецкийн зарим бүс нутагт ч мөн адил нөхцөл байдал хүндэрсэн гэдгийг тэрбээр дурдсан байна.

Түүний хэлснээр, сүүлийн 24 цагийн хугацаанд Оросын цэргүүдэд эзлэгдээд байгаа Авдеевка хотоос баруун хойд зүгт орших Покровскийн чиглэлд 30 удаа зэвсэгт тулгаралт болжээ.

Эх сурвалж: VOA /МОНЦАМЭ агентлаг/