АНУ-ын Ерөнхийлөгч Жо Байден, Бүгд найрамдах намаас /БНН/ түүнтэй өрсөлдөх гэж буй Дональд Трамп нар зургаадугаар сарын 27 ба есдүгээр сарын 10-ны өдрүүдэд хоёр удаа мэтгэлцээн хийхээр лхагва гарагт тохиролцжээ.

“Чиний хэлсэн ёсоор хаана ч, хэзээ ч, ямар ч газарт мэтгэлцэх боломжтой” гэж Ж.Байден олон нийтийн сүлжээндээ бичсэн байна.

Харин Д.Трамп хэлэхдээ "Ж.Байден бол надтай нүүр тулж байсан хүмүүсийн дотроос хамгийн муу мэтгэлцэгч” гэжээ. Тэрбээр олон нийтийн сүлжээн дэх хуудсандаа, би 6, 9 дүгээр сард Жотой мэтгэлцэхэд бэлэн байна” гэж бичжээ.

CNN телевизийн мэдээлснээр, эхний мэтгэлцээнийг тус телевизийн Атланта хот дахь студид үзэгчгүйгээр явуулах бөгөөд Жэйк Таппер, Дана Баш нар хөтлөх ажээ. Жоржиа бол 11 дүгээр сард болох сонгуулийн үеэр ширүүн өрсөлдөөн өрнөх төлөвтэй байгаа муж улсуудын нэг юм.

Нэр дэвшигчид мөн есдүгээр сарын 10-нд хоёр дахь мэтгэлцээнийг зохион байгуулах ABC телевизийн урилгыг хүлээн авчээ. Түүнчлэн БНН-ын их хурлын дараа буюу долоодугаар сард дэд ерөнхийлөгчийн суудлын төлөөх тусдаа мэтгэлцээн явуулахыг санал болгоод байгаа ажээ.

АНУ-ын ерөнхийлөгчийн сонгуульд бие даан нэр дэвшиж буй Роберт Кеннеди зургаадугаар сарын 20-ноос өмнө CNN-ийн мэтгэлцээнд оролцох шалгуурыг хангаж чадна гэдгээ X хуудсандаа бичжээ. Тэрбээр мэтгэлцээнд оролцож эсэх нь одоогоор тодорхойгүй байгаа юм.

Эх сурвалж: The Reuters /МОНЦАМЭ агентлаг/