Өдгөө Лондонгийн Филлип Молд галлерейд буй ИБУИНВУ-ын ван Чарльзын анхны албан ёсны хөргийг амьтны эрхийн төлөө тэмцэгчид сүйтгэжээ.

Тухайлбал, улаан өнгийн дэвсгэрээсээ болоод олны дунд маргаан дагуулж, шуугиан тариад байсан эл хөрөг дээр “Энимал Райсин”(Animal rising) бүлгэмийн хоёр гишүүн Английн “Валлас, Громит хоёр” инээдмийн хүүхэлдэйн киноны Валласын нүүрийг “Бяслаг байхгүй ээ, Громит. Амьтдыг хүчирхийллээс хамгаалах дээдсийн нийгэмлэгийнхний фермүүд ямар харгис байгааг хар л даа” хэмээн хэлж байгаа мэтээр наажээ.

Ийнхүү эсэргүүцлээ илэрхийлэх болсны шалтгаан нь, тухайн бүлгэмийнхэн өнгөрсөн долоо хоногт дээр дурдсан нийгэмлэгийн стандартыг баримталдаг гэх 45 фермээр явж шалгасан байна. Гэтэл амьтдыг торонд хашихгүй, сэлүүхэн тухтай орчинд байлгана хэмээн амладаг тус стандарт огт хэрэгжээгүй, амьтдыг асар их тарчлааж байсан гэнэ.

Үүний хариуд Амьтдыг хүчирхийллээс хамгаалах дээдсийн нийгэмлэг тус бүлгэмийн зорилгыг ойлгож байгаагаа, хөндөгдсөн асуудалд онцгой анхаарал хандуулахаа амлан, мөн хууль бус үйлдэл хийснийг нь буруушаасан мэдэгдэл хийсэн юм.

Харин галлерейн эзний мэдээлж байгаагаар хөрөг хамгаалалтын бүрхүүлтэй байсан учир ямар нэг байдлаар гэмтээгүй, эсэргүүцэгчдийн наасан зургийг арван секундийн дотор хуулсан, цагдаад мэдэгдсэн аж.

Эх сурвалж: CNN