Старлинкийн ачаар цахим орчинд нэвтэрсэн Амазоны уугуул омгийнхон насанд хүрэгчдийн контент, порно кинонд донтсон гэх мэдээлэл олон улсад эрчимтэй тархсан явдалд Марубо омгийнхон ихэд харамсаж, залруулга хийж байна.

Тухайлбал, энэ долоо хоногт Нью Йорк Таймс агентлаг “Амазоны уугуул омог порнографид донтоогүй” гэх мэдээ нийтэлж, түүндээ дээрх мэдээлэл худал байсныг тайлбарласан байна.

Эргэн санавал, энэ сарын 2-нд нийтэлсэн мэдээндээ тус агентлаг хоёр сарын өмнө Старлинкийн хиймэл дагуулын ачаар цахим орчинд нэвтэрсэн Марубо омгийнхны амьдрал хэрхэн өөрчлөгдөж байгааг сурвалжилсан билээ. Тус омгийн 2000 орчим гишүүн өдөр тутамдаа цахим орчинд нэвтэрч, шинийг сурч, хоорондоо шуурхай харилцаж байгаа ч зарим нь энэ шинэчлэл омгийнхны соёл, уламжлалд муугаар нөлөөлөх вий гэдгээс санаа зовж байгаагаа илэрхийлсэн юм. Тухайлбал, омгийн хөгшчүүд өсвөр насныхан нь гар утаснаас салахаа болих вий, бага насныхан порно кино үзэх вий гэж болгоомжилж байгаагаа хэлсэн аж.

Гэвч тус мэдээ нийтлэгдсэний дараа олон мэдээллийн эх сурвалжууд баримтыг гуйвуулан тараасан гэнэ.

Иймд тус омгийн зарим гишүүд эсэргүүцлийн хөдөлгөөн өрнүүлж эхэлсэн байна. Омгийн ахлагч Энох Марубо “Энэ мэдээлэл ямар ч үндэслэлгүй худал. Цаашлаад манай эрх, соёлд бүдүүлгээр халдсан үйлдэл болж байна” хэмээжээ.

Эх сурвалж: Yonhap