Хиймэл оюун ухааны технологийн салбартаа түүчээлэгч OpenAI компани энэ жилийн борлуулалтын зорилгоо 3.4 тэрбум ам.доллар хэмээн тодорхойлсон байна.

Bloomberg News агентлагийн орон нутгийн цагаар 12-ны мэдээлснээр, OpenAI компанийн гүйцэтгэх захирал Сэм Альтман мөн өдөр зохион байгуулагдсан хурал дээр нийт ажилчиддаа хандаж хэлэхдээ, энэ жил компанийн бүтээгдэхүүн үйлчилгээнээс 3.2 тэрбум ам.долларын борлуулалт олно гэжээ.

Харин үлдсэн 200 сая ам.долларыг Мicrosoft компанийн Azure үүлэн үйлчилгээнд өөрийн компанийн хиймэл оюун ухааны загварыг ашиглах боломжийг бүрдүүлснээр олохоор төлөвлөж буй аж. Тус компанийн борлуулалт өнгөрсөн онд 1.6 тэрбум ам.долларт хүрч байсан билээ.

ChatGPT чатботыг танилцуулснаар дэлхийн хиймэл оюун ухааны технологийн хөгжлийг нэг шат ахиулсан OpenAI компани өнгөрсөн сард хүмүүстэй харилцах боломжтой ChatGPT-4o-г танилцуулснаараа олон нийтийн анхаарлыг ахин татсан юм. Түүнчлэн өөрийн бүтээгдэхүүнүүддээ хиймэл оюун ухааны функцийг нэвтрүүлэхээр оролдож буй Apple компани OpenAI-тай хамтран ChatGPT технологийг ашиглах болсон тухайгаа өнгөрөгч 10-ны өдөр мөн мэдээлсэн юм.

Тус компани энэ оны эхээр компаниа 86 тэрбум ам.доллароор үнэлж тендер зарлах санал оруулж байсан билээ.

Эх сурвалж: Asiae