Цахилгаан автомашин үйлдвэрлэгч АНУ-ын Теsla компани лити олборлогч компанийг худалдан авахаар хэлэлцэж байгаа талаар Bloomberg агентлаг мэдээллээ.
Тус агентлаг нь энэ талаар сайн мэддэг эх сурвалжаас иш татан, Тesla компани лити олборлогч Канадын Sigma Lithium компанийг худалдан авах талаар хэлэлцэж байгааг онцолсон байна. Sigma Lithium нь цахилгаан тээврийн хэрэгслийн батарейны гол түүхий эд гэж тооцогддог лити үйлдвэрлэгч компани юм.
Одоогоор тус компани нь ирэх 4-р сард ашиглалтад оруулах төлөвлөгөөтэйгөөр Бразилд “Grotta do Cirillo” гэх томоохон хэмжээний литийн уурхайн бүтээн байгуулалтын ажлыг ид гүйцэтгэж байгаа аж. Sigma Lithium компанийн зүгээс мэдэгдсэнээр энэхүү ордын ашигт малтмалын нөөц таамаглаж байснаас 63 хувиар их болох нь тогтоогдсон гээд 2024 он гэхэд литийн олборлолтын хэмжээгээ гурав дахин нэмэгдүүлэх бүрэн боломжтой гэдгийг өнгөрөгч 12-р сард зарласан билээ.
Түүнчлэн автомашин үйлдвэрлэгч General Motors компани өнгөрсөн сард мөн л Канадын лити олборлогч Lithium America-ийн багагүй хувийг худалдаж авснаа мэдэгдсэн талаар бид өмнө нь мэдээлж байсан билээ.
Эх сурвалж: YTN