Итали улс "Бүс ба Зам" санаачилгаас гарч байгаагаа Хятадын талд албан ёсоор мэдэгдсэн тухай Италийн өдөр тутмын Corriere della Sera сонин засгийн газрын албан тушаалтны үгнээс иш татан орон нутгийн цагаар 6-ны өдөр мэдээлсэн байна.
Тус мэдээнд дурдсанаар Италийн засгийн газар өнгөрөгч 3-ны өдөр Хятадын засгийн газарт "Бүс ба Зам" санаачлагын гэрээг сунгахгүй гэх агуулга бүхий албан бичгийг хүргүүлсэн хэмээн онцолжээ.
Түүнчлэн Италийн ANSA, Reuters, France Press зэрэг гадаадын томоохон хэвлэл мэдээллийн агентлагууд Итали улс дөрвөн жилийн дараа Хятадын "Бүс ба Зам" санаачилгаас албан ёсоор гарч буй талаар мөн мэдээлэв.
Одоогоор Итали болон Хятадын засгийн газар аль аль энэ талаар албан ёсны мэдэгдэл хийгээгүй байгаа ч Италийн Шадар сайд бөгөөд Гадаад хэргийн сайд Антонио Таяни "Энэхүү төсөл нь бидний хүссэн үр дүнд хүрээгүй бөгөөд цаашид тийм ч ач холбогдол бүхий тэргүүлэх чиглэлийн тоонд тооцогдохоо больсон” хэмээн “Бүс ба зам" санаачилгаас гарах тухай цухуйлгаж байсан юм.
Итали улс нь БНХАУ-ын дарга Ши Жиньпиний санаачилсан олон улсыг хамарсан “Бүс ба зам" санаачлагад 2019 онд нэгдэж байсан ба тус төслийг хамтран хэрэгжүүлж байсан “Их 7”-гийн бүлгийн цорын ганц орон байсан юм.
Эх сурвалж: YTN