Холливудын алдарт жүжигчин Скарлетт Йоханссон олон ч гайхалтай уран бүтээл дээр ажиллаж, өөрийн дүр төрх, дуу хоолойгоо мөнхөлсөн билээ. Харин хиймэл оюун ухаан бүхий туслах гэхээр түүний дуу оруулсан HER уран сайхны кино хэн бүхний санаанд ордог гэхэд хилсдэхгүй.

Тэгвэл хиймэл оюун ухааны салбарт тэргүүлж буй OpenAI компанийн шийдвэр гаргагч багийнхан хийгээд гүйцэтгэх захиралд ч хиймэл оюун ухааны бүхий туслах гэхээр хатагтай Йоханссоны хоолой хамгийн түрүүнд санаанд нь орж ирдэг бололтой.

Тодруулбал, өнгөрөгч долоо хоногт OpenAI компани ChatGPT 4.0 системийнхээ шинэ дуу хоолойнуудыг танилцуулахад дуу хоолойнууд бүгд өөрийн гэсэн нэртэй байсан бөгөөд тэднийг Breeze, Cove, Ember, Juniper болон Sky хэмээн танилцуулжээ. Гэвч тэдгээрийн дундаас Sky-ийн дуу хоолой жүжигчин Скарлетт Йоханссоны дуу хоолойтой хэтэрхий адилхан байсан нь жүжигчин бүсгүйн эгдүүцлийг төрүүлсэн байна.

Энэ талаар жүжигчин бүсгүйн мэдэгдсэнээр, OpenAI компани түүнээс Sky нэрт дуу хоолойнд дуу оруулахыг хүсэхэд тэр татгалзсан боловч компанийн зүгээс түүнтэй яг ижил дуу хоолойг олсон тул тэрээр хуулийн багтай хамтран ажиллахаас өөр аргагүй нөхцөлд хүрсэн гэсэн юм. Учир нь түүний сэрдэж байгаагаар OpenAI компани түүний хоолойг хиймэл оюун ухаанаар хуулбарласан байж болзошгүй аж.

Гэвч компанийн зүгээс мэдэгдсэнээр тэд түүний хоолойг хиймэл оюун ухаанаар боловсруулаагүй харин түүнтэй ижил хоолойтой бодит жүжигчнийг олж чадсан, гэсэн хэдий ч түүний хувийн нууцыг хамгаалах үүднээс дуу оруулагчийн тухай мэдээлэл өгч чадахгүй гэжээ.

Ямартай ч тэдний зүгээс Sky нэрт дуу хоолойг хэрэглээнд нэвтрүүлэхээ түр хугацаанд зогсоосон байна.

Эх сурвалж: NY Post