Хиймэл оюун ухааны технологид зориулсан хагас дамжуулагч үйлдвэрлэлээрээ дэлхийд тэргүүлэгч Nvidia компанийн хувьцааны үнэ ойрын өдрүүдэд өдөр бүр дээд амжилт тогтоож, 1100 долларын босгыг давжээ.

Орон нутгийн цагаар 28-ны өдөр Нью-Йоркийн хөрөнгийн бирж дээр Nvidia компанийн хувьцааны үнэ өмнөх арилжааны өдрөөс 6.98 хувиар өсөж, 1139.01 ам.долларт хүрсэн байна.

Нэгдүгээр улирлын гүйцэтгэлээ зарласны маргааш буюу өнгөрөгч 23-ны өдөр 1000 ам.долларыг давсан бол түүнээс ердөө хоёрхон хоногийн дараа ийнхүү 1100 ам.долларыг даваад байгаа юм.

Улмаар тус компанийн зах зээлийн үнэлгээ 2.81 их наяд ам.долларт хүрснээр 3 их наяд ам.долларт тун ойрхон ирээд байна. Түүнчлэн зах зээлийн үнэлгээгээр хоёрдугаарт жагсдаг Apple компаниас ердөө 112 тэрбум ам.долларын зөрүүтэй болоод байгаа юм.

Өнгөрсөн оны зургадугаар сард зах зээлийн үнэлгээ нь 1 их наяд ам.долларыг давснаас хойш 10 сарын дараа буюу өнгөрөгч хоёрдугаар сард тус компанийн зах зээлийн үнэлгээ 2 их наяд ам.долларт хүрсэн билээ.

Шинжилгээнээс харахад Nvidia-ийн хувьцааны үнэ өсөхөд санхүүгийн жилийн эхний улиралд үзүүлсэн өндөр гүйцэтгэл, ирэх сард хийхээр төлөвлөж буй хувьцааны хуваагдал нөлөөлсөн гэж дүгнэж болох юм.

Эх сурвалж: MBC