Чили дэх дэлхийн хамгийн том зэсийн уурхайн ажилчид ажил хаялт зарласан нь зэсийн нийлүүлэлт тасалдахад хүргэж, үнэ өсөхөд нөлөөлөх вий гэсэн болгоомжлолыг дэлхий дахинд төрүүлээд байна.

Ройтерс болон орон нутгийн бусад мэдээллийн агентлагуудын орон нутгийн цагаар 14-ний өдөр мэдээлснээр, Чилийн хойд хэсэгт орших Эскондида уурхайн ажилчид удирдлагуудтайгаа цалин хөлсний асуудлаар хийсэн хэлэлцээ амжилтгүй болсон даруйд ажил хаялт зарлаж, дэлхийн зэсийн зах зээлд тодорхой бус байдлыг үүсгээд буй талаар онцлов.

Эскондида уурхай нь дэлхийн хамгийн том зэсийн уурхай бөгөөд дэлхийн жилийн зэсийн үйлдвэрлэлийн ойролцоогоор 5 хувийг хариуцдаг аж. Түүнчлэн Австралийн BHP компани тус уурхайн 57 хувийг эзэмшдэгээс гадна удирдлагын эрх үүргийг хариуцдаг юм.

Тодруулбал 2400 ажилчинтай тус уурхайн үйлдвэрчний эвлэлийнхэн энэ оны эхээр зэсийн үнэ огцом өссөн гэх шалтгаанаар урамшууллыг нэмэгдүүлж, ажлын өдрийг богиносгохыг шаардсан ч удирдлагуудтайгаа тохиролцоонд хүрч чадаагүйн улмаас ийнхүү ажил хаялт зарласан байна.

Тус компани яаралтай системийн дагуу үйл ажиллагаагаа үргэлжлүүлнэ гэж мэдэгдсэн ч олборлолтоо хэр хэмжээгээр бууруулах талаар мэдээлэл өгөөгүй аж.

Одоогоор тус уурхайн ажилчдын ажил хаялт зэсийн үнэд төдийлөн нөлөөлөхгүй гэж мэргэжилтнүүд үзэж байгаа ч олборлолт нэг, хоёр долоо хоногоос илүү хугацаагаар хойшлогдсон тохиолдолд сөргөөр нөлөөлөх нь тодорхой юм.

2017 онд Эскондида уурхайн ажилчид 44 хоног ажил хаяснаар зэсийн үйлдвэрлэл зогсож байсан удаатай.

Эх сурвалж: MBC