Хиймэл оюун ухааны технологид зориулсан хагас дамжуулагч үйлдвэрлэлээрээ тэргүүлэгч Nvidia компани зах зээлийн хүлээлтээс давсан улирлын гүйцэтгэлээ зарлав.
Өдгөө тус компанийн нэгж хувьцаа нь 1000 ам.долларыг даваад буй бөгөөд удахгүй хувьцааны хуваалт хийхээ мөн мэдэгдсэн байна.
Nvidia компанийн зүгээс орон нутгийн цагаар 22-ны өдөр зарласан санхүүгийн нэгдүгээр улирлын борлуулалтын орлого 26.04 тэрбум ам.долларт хүрснээс гадна нэгж хувьцаанд ногдох цэвэр ашиг нь 6.12 ам.доллар болсныг онцлов.
Энэ нь өнгөрсөн оны мөн үетэй харьцуулахад борлуулалт 262 хувиар, нэгж хувьцаанд ногдох ашиг 4.5 дахин өссөн үзүүлэлт юм.
Түүнчлэн тус компани 2-р улиралд (5-р сараас 7-р сарыг дуустал) 28 тэрбум ам.долларын борлуулалт хийнэ гэж таамаглаж байгаа бөгөөд хувьцаагаа 10-ны 1-ээр хуваалт хийхээ мэдэгдсэн байна.
Хиймэл оюун ухааны технологийн хагас дамжуулагч бүхий Nvidia компанийн дата төвийн эхний улирлын борлуулалт өнгөрсөн оны мөн үетэй харьцуулахад 427 хувиар өсөж 22.6 тэрбум долларт хүрчээ.
АНУ-ын эдийн засгийн мэдээллээр төрөлжсөн CNBC суваг “Nvidia-гийн улирлын борлуулалт жилийн өмнөхөөс 262 хувиар өссөн нь хиймэл оюун ухааны “галзуурал” үргэлжилж байгааг харуулж байна" хэмээн онцлон тэмдэглэв.
Эх сурвалж: MBC