Bloomberg News агентлагийн орон нутгийн цагаар 10-ны өдөр мэдээлснээр, хагас дамжуулагч үйлдвэрлэлээрээ дэлхийд тэргүүлэгч Тайванийн TSMC компанийн 8-р сарын борлуулалт өнгөрсөн оныхоос 33 хувиар өссөн талаар онцолжээ.
TSMC-ийн наймдугаар сарын борлуулалт 250.87 тэрбум тайвань долларт хүрсэн нь өнгөрсөн оны мөн үетэй харьцуулахад 33 хувиар өссөн үзүүлэлт аж. Харин өмнөх сартай харьцуулахад 2.4 хувиар буурсан байна.
Bloomberg News агентлагийн зүгээс хөрөнгө оруулагчдын ухаалаг гар утасны зах зээлд тавих “бооцооны” хэмжээ улам ихсэж байгаагаас гадна NVIDIA-гийн хиймэл оюун ухааны технологид зориулсан чипийн эрэлт багасахгүй байгаа зэрэг нь ийнхүү өсөлттэй ажиллахад эергээр нөлөөлсөн хэмээн тайлбарлав.
Түүнчлэн сүүлийн үед хиймэл оюун ухааны дэд бүтцийн зарцуулалтын тогтвортой байдлыг хэт өндрөөр үнэлж байгааг зах зээлийн зүгээс онцолсон ч энэ нь тийм ч асуудал дагуулах зүйл биш гэж шинжээчид цохон тэмдэглэсэн юм. TSMC-ийн орлогын талаас илүү хувь нь хиймэл оюун ухааны технологид зориулсан бүтээгдэхүүнээс бүрдсэн байна.
Tус компани нь Apple-ийн iPhone-ийн үндсэн процессорыг үйлдвэрлэдэг гэдгээрээ олонд танигдсан билээ. Тэгвэл Apple компани өмнөх өдөр нь iPhone 16 цувралаа танилцуулснаар гар утас, хөдөлгөөнт төхөөрөмжтэй холбоотой технологийн эрэлт сэргэнэ гэж Уолл Стритийн шинжээчид найдаж байгаагаа илэрхийлсэн байна.
Шинжээчид TSMC компанийн борлуулалт гуравдугаар улиралд 37 хувиар өснө гэж таамаглаж байгаа аж.
Эхний ээлжинд TSMC энэ жилийн борлуулалтын хэмжээ өмнөх жилтэй харьцуулахад 20 хувиар өснө гэж таамагласан ч өнгөрөгч 7-р сард энэ түвшиндээ хүрснээр таамаглалыг нэмэгдүүлсэн юм.
Эх сурвалж: Asiae