222 жилийн түүхтэй Америкийн үндэстэн дамнасан химийн компани DuPont гурван компанид хуваагдах төлөвтэй байна.
Wall Street Journal, CNN зэрэг гадаадын хэвлэл мэдээллийн хэрэгслүүдийн орон нутгийн цагаар 22-ны өдөр мэдээлснээр, DuPont компани хөрөнгийн биржид бүртгэлтэй гурван компани болон хуваагдах төлөвлөгөөтэй байгаагаа зарлаж, дараагийн 18-24 сарын хугацаанд уг ажлыг дуусгавар болгон хэмээн мэдэгджээ. Гэхдээ тус компанийн захирлуудын зөвлөлөөс эцсийн зөвшөөрлийг авах шаардлагатай аж.
Компанийн зүгээс мэдээлснээр электроникийн салбар болон усны салбарын бизнес нь бие даасан шинэ компани болох ба одоохондоо нэр нь тодорхой болоогүй байгааг онцлов. Электроникийн салбар нь хагас дамжуулагчийн технологи, дэвшилтэт электрон бүтээгдэхүүнд анхаарлаа төвлөрүүлэх бол усны бизнес нь усны цогц шийдэл нийлүүлэгч болж дахин “мэндлэх” гэнэ. Харин бусад салбаруудын хувьд DuPont-ийн нэг хэсэг хэвээр үлдэх аж.
Түүнчлэн ирэх сарын 1-нээс эхлэн DuPont-ийн Санхүү эрхэлсэн захирал Рори Кох гүйцэтгэх захирлын албан тушаалд дэвшин компанийг удирдахаар болсон талаар мэдэгдсэн байна. Харин одоогийн гүйцэтгэх захирал Эдвард Брин ТУЗ-ийн даргын албан тушаалдаа үлдэхээр болж буй аж. Тэрчлэн DuPont-ийн хуваагдал тодорхой болж шийдэгдмэгц Кох аль нэг компанийн гүйцэтгэх захирлаар томилогдоно хэмээн компани мэдэгдэлдээ дурджээ.
Сүүлийн жилүүдэд General Electric (GE), Kellogg, Johnson & Johnson (J&J) зэрэг аварга компаниуд ар араасаа бизнесээ салбар салбараар нь хувааж байгаа энэ үед DuPont ч үүнтэй ижил шийдвэрийг гаргаж байгаа нь шинжээчдийн анхаарлыг ихээхэн татсан байна. Эдгээр томоохон компаниудын гүйцэтгэх захирлууд болон захирлуудын зөвлөл зохион байгуулалтын уян хатан байдлыг илүүд үзэх болсон нь үүнээс харагдаж байна.
"Гурван компани болон хуваагдах нь бидэнд илүү уян хатан байдлыг бий болгож, хувьцаа эзэмшигчид болон үйлчлүүлэгч, харилцагчдад нэмэлт үнэ цэнийг бий болгохоос гадна ажилчдад шинэ боломжыг нээж өгнө” хэмээн гүйцэтгэх кахирал ноён Брин мэдэгдэв. Тэрээр үргэлжлүүлэн “Илүү жижгэрч хөрвөх чадвартай болсон компаниуд цаашид багцаа бэхжүүлж, M&A хэлцэл зэрэг өсөлтийн стратегиа хэрэгжүүлэхэд энэхүү уян хатан байдал нь сайнаар нөлөөлөх нь дамжиггүй” хэмээн нэмж өгүүлсэн байна.
Эх сурвалж: Hankyung