Австралийн алслагдсан тосгоны иргэд тэжээвэр амьтдыг нь барьж идээд, хүүхдүүдийг элдэн хөөгөөд байсан давстай усны аварга матрыг агнаж идэн өшөөгөө авчээ.

Тухайлбал, Австралийн умард хэсгийн Булла тосгоны цагдаа нар энэ долоо хоногт тус матрыг нийгэмд онц аюултай хэмээн үзэж буудан хороосон байна. Цагдаа нарын мэдээлснээр тэр матар үе үе уснаасаа гарч, ойр хавийн хүүхэд, томчуудыг айлгаж ичээхийн дээр хөршүүдийн хэд хэдэн нохойг залгисан аж.

Иймд матрыг агнасны дараа нутгийн иргэд цуглан бага насны хүүхдүүдэд матрын аюул болон түүнээс сэргийлэх сургалт орж, матрыг ойроос харуулан танилцуулсны дараа уламжлалт аргаар бэлтгэн зооглосон байна.

Тэгэхдээ матрын сүүлээр шөл хийж, зарим хэсгийг нь ил гал дээр шарж, зөөлөн махыг нь гадилны хальсанд ороож нурманд булж болгосон гэнэ.

Австралид уг нь давстай усны, цэнгэг усны аль аль матрыг авлах хориотой. Учир нь анчдаас болж матар устах аюулд ороод байсан тул 1971 онд хуулиар хориглож байжээ. Гэвч түүнээс хойш матрын тоо толгой тасралтгүй өссөөр өдгөө тухайн нутагт 100 мянга даваад байгаа гэнэ.

Эх сурвалж: CNN