![](c/2407/V7-3X3ZCMF-FLQ4UJQ-YYM7SDV-B2.jpg)
Хятадын судлаачид сарны хөрсөнөөс анх удаа усны молекул илрүүлснээ мэдэгдлээ.
Хонконгийн South China Morning Post сонин болон AFP агентлагуудын мэдээлснээр, Хятадын “Chang-e 5” нисгэгчгүй сансрын хөлгийн 2020 онд авчирсан сарны хөрсний дээжээс их хэмжээний молекул агуулсан усжуулсан эрдэс илрүүлснээ тус улсын шинжлэх ухааны академи өмнөх өдөр нь зарласан болохыг онцлов.
Түүнчлэн шинжлэх ухааны "Nature Astronomy" сэтгүүлд 16-ны өдөр дээрх агуулга бүхий судалгааны өгүүлэл нийтлэгджээ.
Саран дээр ус байдгийг нотолсон энэхүү нээлт нь шинжлэх ухааны үүднээс сарны хувьслын үйл явцыг судлах, сарны нөөцийг хэрхэн ашиглах талаарх үндсэн ойлголтод ихээхэн тус дөхөм болно гэж эрдэмтэд үнэлэв.
Үүний зэрэгцээ, South China Morning Post сонин нэрээ нууцлахыг хүссэн эрдэмтний хэлсэн үгийг иш татан, "Хэрэв уг усны агууламжтай эрдэс нь сарны дээжинд байгаа бол нэгээс илүү олдох ёстой. Хятадын судлаачид энэхүү нээлтээ нотлох олон баримт олно гэж найдаж байна” хэмээн сэтгэгдлээ илэрхийлжээ.
АНУ 1960-аад онд “Аpollo 11” хөлгийн тусламжтайгаар сарнаа газардаж, тухайн үед сарыг судлахаар авсан сарны хөрсний дээжээс усны ул мөр олдоогүй хэмээн мэдэгдэж байсан билээ. Үүнээс улбаатайгаар саран дээр ус байхгүй гэсэн таамаг олон арван жилийн турш хөвөрсөөр ирсэн юм.
Эх сурвалж: MBC