Британийн хааны өмчийн менежментийн сан болох Crown Estate-ийн энэ жилийн ашиг орлого салхины эрчим хүчний үйлдвэрлэлийн ачаар өмнөх жилтэй харьцуулахад хоёр дахин нэмэгджээ.
BBC зэрэг гадаадын томоохон хэвлэл мэдээллийн хэрэгслүүдийн орон нутгийн цагаар 24-ний өдөр мэдээлснээр, Crown Estate компани 2023-2024 оны санхүүгийн жилийн (2023 оны 4-р сараас 2024 оны 3-р сар хүртэл) тайландаа 1,1 тэрбум фунт стерлингийн ашигтай ажилласнаа зарласан талаар онцлов. Энэ нь өнгөрсөн жил 442.6 сая фунтын ашигтай ажилласантай харьцуулахад хоёр дахин нэмэгдсэн үзүүлэлт бөгөөд түүхэн дээд хэмжээ юм.
Crown Estate нь Английн хаан болон түүний өв залгамжлагчдын мэдэлд байдаг. Одоогоор Английн хаан Чарльз III-д харьяалагддаг юм. Лондонгийн төвийн Режент гудамж, Сент Жеймс дүүрэг дэх үл хөдлөх хөрөнгө, Виндзорын шилтгээн орчмын Виндзор Их Паркаас гадна Англи, Уэльс, Умард Ирландыг тойрсон далайг эзэмшдэг.
Тодруулбал өнгөрсөн жилийн түүхэн дээд хэмжээний ашгийг салхин цахилгаан станцын түрээсийн бизнесээс олсон байна. Гадаадын хэвлэл мэдээллийн хэрэгслүүдийн мэдээлснээр Британийн газар нутагт орших далайд 15 гигаватт (ГВт) орчим эрчим хүч үйлдвэрлэх хүчин чадалтай далайн салхин цахилгаан станц суурилуулсан байдаг аж. Их Британийн 2030 он гэхэд нүүрсхүчлийн хийг саармагжуулах зорилтын нэг чухал хэсэг нь далайн салхин цахилгаан станцыг өргөжүүлэх явдал бөгөөд өнгөрсөн онд тус улсын эрчим хүчний үйлдвэрлэлийн 17 хувийг бүрдүүлсэн байна.
Crown Estate-ийн олсон бүх ашиг нь Төрийн сан руу ордог бөгөөд хааны гэр бүл тодорхой хэсгийг орлого болгон авдаг. Орлогын хэмжээ 2023-2024 оны төсвийн жилд 25 хувь байсан бол 2024-2025 оны төсвийн жилд 12 хувь байхаар тогтоожээ. Тус сангаас авсан хааны гэр бүлийн орлогын нийт хэмжээ гурван жил дараалан 86.3 сая фунт стерлингээс буугаагүй байна.
Үүний зэрэгцээ, уур амьсгалын өөрчлөлтөд хариу арга хэмжээ авах нь Чарльз III хааны үргэлж санаа зовдог асуудлын нэг юм. Хатан хааны гэр бүлийнхэн ирэх санхүүгийн жилд хааны хоёр Bentley маркын автомашиныг био түлшээр ажилладаг автомашин болгох бол цаашид цахилгаан автомашинаар солихоор төлөвлөж байна. Тэрчлэн солихоор төлөвлөж буй хоёр нисдэг тэргээ ч тогтвортой түлшээр ажилладаг болгох аж.
Эх сурвалж: Asiae
