Кореан Эйрийн Инчоноос Улаанбаатар хүрэх КЕ197 нислэгийн үеэр онгоц хүчтэй доргисноос шалтгаалан монгол зорчигч нар хөнгөн гэмтжээ.

Кореан Эйр компанийн өнөөдөр/08.05/ мэдээлснээр КЕ197 нислэг 281 зорчигчтой хөөрөөд, энэ сарын 4-ний өглөөний 9 цаг 40 минутад Хятадын Тианжин нисэх онгоцны буудлын ойролцоо 10.4км өндөрт агаарын хүчтэй урсгалтай тулгарч доргисон гэнэ.

Эх сурвалжийн мэдээлснээр онгоц арван таван секундийн турш дээш доош доргин ширээ, тавцан дээр байсан хоол хүнс гэх мэт бусад зүйлс бүгд шалаар таран асгарсан гэнэ. Доргиж дууссаны дараа 10 зорчигч, нислэгийн багийн дөрвөн гишүүний нуруу, хүзүү өвдсөн аж. Гэхдээ одоогийн байдлаар хүнд бэртсэн хүн байхгүй гэнэ.

Иймд нислэгийн багийн зүгээс зорчигчдод өвчин намдаах эм зэргээр үйлчилж, Улаанбаатарт газардмагц эмч, эмнэлгийн ажилчдын тусламж үзүүлсэн байна.

Эх сурвалж: YONHAP