Ираны тал ойрын хугацаанд ойрын зайн тусгалтай олон тооны баллистик пуужинг ОХУ-д нийлүүлэхээр болсон талаар Европын тагнуулын хоёр эх сурвалжаас иш татан Ройтерс агентлаг мэдээллээ.
Одоогийн байдлаар Иранд Оросын олон арван цэргийн алба хаагчид ойрын тусгалтай “Фатах-360” пуужинг хэрхэн ашиглах талаар сургалтад сууж байгаа бөгөөд пуужинг удахгүй нийлүүлнэ гэж эдгээр эх сурвалжууд мэдээлсэн байна.
ОХУ-ын Батлан хамгаалах яам болон Ираны албаны хүмүүс өнгөрсөн оны арванхоёрдугаар сарын 13-нд Ираны нийслэл Тегеранд уулзах үеэрээ гэрээнд гарын үсэг зурсан бөгөөд үүний дагуу Иран улс "Фатах-360" болон бусад “Абибил” зэрэг баллистик пуужингуудыг ОХУ-д нийлүүлнэ гэв.
Эх сурвалжууд эдгээр пуужинг Орост яг хэзээ нийлүүлэх талаар тодорхой мэдээлээгүй ч Ройтерс агентлагийн зүгээс тун удахгүй нийлүүлэлт хийх төлөвтэй байна хэмээн цохон тэмдэглэсэн байна.
ОХУ-д нийлүүлэхээр төлөвлөж буй Ираны “Фатах-360” пуужин нь 150 килограмм бүхий цэнэгт хошуутайгаар 120 километр хүртэл нисэх чадвартай ойрын тусгалтай баллистик пуужин юм.
ОХУ-ын хувьд өөрийн баллистик пуужинтай ч Иранаас “Фатах-360” пуужинг хүлээн авбал ойрын зайн цохилтод байрлуулж, фронтын шугамаас хол зайд өөрийн зэвсгээр довтлоход анхаарлаа хандуулах болов уу хэмээн цэргийн мэргэжилтнүүд онцолжээ.
Эх сурвалж: MBC