АНУ өөрсдийнхөө үйлдвэрлэн нийлүүлсэн алсын тусгалт ATACMS пуужинг нь Киев ОХУ-ын газар нутгийн гүн рүү харвахгүй байхаар тушаасан хоригоо сулруулах гэж байгаа талаар конгрессийн гишүүн дэлгэжээ.
Ийм хориг тавьж байсны шалтгаан нь АНУ болон түүний холбоотон улсууд хэдий 200 тэрбум гаруй ам.доллараар Украиныг зэвсэглэж байгаа ч Оростой шууд дайсагнаагүй гэдгийг илэрхийлэхэд оршиж байжээ. Харин Киев дээрх хоригоо сулруулахыг энэ оны тавдугаар сараас эхлэн шаардсаар байсан аж.
Тэгвэл, АНУ-ын төрийн нарийн бичгийн дарга Их Британийн Дэвид Лэммитэй хамт Киевт айлчлахдаа дээрх хоригийг сулруулахаар болсон тухай мэдэгдэх гэж байгаа хэмээн конгрессийн гишүүн Майкл МакКаул задруулжээ.
Тэрээр “Би хоёр өдрийн өмнө Блинкентэй ярилцсан юм. Тэр Киевт айлчлахдаа ATACMS пуужинг ОХУ-ын эсрэг ашиглахыг зөвшөөрөх гэж байгаа гэнэ” хэмээн ярьсан байна.
Шинжээчдийн үзэж байгаагаар Иран Москваг баллистик пуужингаар хангаж байгаа гэх мэдээлэл Вашингтоны бодлыг өөрчилсөн байж магадгүй юм.
Блинкений мэдээлснээр “Иран ОХУ-руу тодорхойгүй тооны Фат-360 пуужин илгээсэн, түүнийг нь Москва хэдхэн долоо хоногийн дотор Украин руу харвах нь дамжиггүй” гэсэн байна.
Харин Ираны зүгээс дээрх мэдээллийг үгүйсгэж, худал мэдээлэл дэлгэрүүлэх замаар АНУ сэтгэл зүйн дайн хийхээр оролдож байна гэж байгаа юм.
Эх сурвалж: RT Yonhap