БНХАУ-ын цахим худалдааны AliExpress, Temu, Xinyin гэх мэт сайтуудаас захиалсан сандаал, малгайнд шинжилгээ хийж үзэхэд хүний биед хортой бодисуудын хэмжээ зөвшөөрөгдсөн хэмжээнээс даруй 229 дахин өндөр байгаа нь илэрчээ.

Сөүл хотын захиргааны энэ сарын 14-нд мэдээлснээс үзвэл, дээрх гурван цахим худалдаанаас түүврийн аргаар захиалсан 144 бараанд ээлжит шалгалт хийж үзэхэд 11 нь эрүүл мэнд, аюулгүй байдлын хувьд асуудалтай гэх хариу гарчээ.

Тухайлбал, долоодугаар сарын 12-ноос энэ сарын 9-ний хооронд Сөүл хотын захиргааны Эрүүл мэнд, орчны судалгааны хүрээлэн мэргэжлийн гурван байгууллагатай хамтран цахимаар захиалсан хоолны сав 94, гоо сайхны бараа 13, сандаал, малгай 28, ариун цэврийн хэрэгсэл есийг шинжилсэн байна.

Шинжилгээний дүнд флатат хуванцаржуулагч бодис зөвшөөрөгдсөн хэмжээнээс даруй 167.5-229.2 дахин өндөр гарсан байна. Флатат хуванцарнуулагч бодисууд бэлгийн эсийн тоог цөөрүүлдэг, үргүйдүүлдэг, хорт хавдар үүсгэдэг гэдгийг мэргэжилтнүүд сэрэмжлүүлдэг билээ.

Түүнээс гадна хоёр сандаалаас зөвшөөрөгдсөн хэмжээнээс 2-9 дахин их никел илэрсэн байна. Никел их байснаар арьсанд харшил үүсгэх асуудал түгээмэл үүсдэг билээ.

Мөн хэд хэдэн малгайнаас хорт хавдар үүсгэгч формальдегид бодис хоёр дахин өндөр, хоёр хөнгөн цагаан данхнаас никел хоёр дахин өндөр, хоёр төрлийн хумсны будагнаас диоксан 3.6 дахин өндөр, метанол 1.4 дахин өндөр илэрсэн байна.

Гоо сайхны бүтээгдэхүүний бүтцийг зөөллөхөд ашигладаг диоксины хувьд зөвшөөрөгдсөн хэмжээнээс илүү гарах нь хорт хавдар үүсгэх, метанол өндөр агуулагдах нь нүд, амьсгалын замд сөргөөр нөлөөлөх, удаан хугацаандаа төв мэдрэлийн систем, хоол боловсруулах систем, харааны мэдрэлд аюул учруулах эрсдэлтэй байдаг аж.

Эх сурвалж: Yonhap