Малайзад анхны халуун тогоотой кино театрыг Куала Лампурын Дади кино театр нээхээр болжээ. Гэвч нээлтийн тодорхой тов хараахан зарлаагүй байгаа аж. Зоог барингаа кино үзэх онцгой хачирхалтай үйлчилгээ эх газрын Хятадад тренд болоод байгаа билээ.
Хонгконг жүжигчин Боско Вонг энэ сард Дади кино театрт зочлон шинэ киногоо танилцуулахын сацуу халуун тогоотой кино театр ямархуу байх талаар эхний төрх, байдлыг хүмүүст цухуйлган харуулжээ.
Кино эхлэхээс өмнө кино театрын ажилтнууд үзэгчийн суудлуудын өмнө тусгайлан байрлуулсан ширээн дээр халуун тогоонд чанах ногоо, гоймон, мах, шөл зэргийг авчирч бэлдэж өгөх гэнэ.
Мөн халуун тогооноос гадна лазаниа, шарсан тахиа гэх мэт хоолоор үйлчилдэг кино театрууд Малайзад хэд хэд бий.
Үүнээс өмнө 2023 онд Хятадын Сичуан мужийн кино театрт халуун тогооны үйлчилгээ нэвтэрч олныг шуугиулж, үзэл бодлыг нь хоёр талд талцуулаад амжсан билээ. Тус онцгой үзвэр үнийн хувьд 123-188 юань байдаг гэнэ.
Эх сурвалж: World of buzz
