Олон улсын хүүхэд үрчлүүлэх хөтөлбөрөө албан ёсоор зогсоож байгааг БНХАУ-ын Гадаад хэргийн яам мэдээлжээ.
Улмаар Хятад улсаас хүүхэд үрчилж авах хүсэлтийнхээ хариуг хүлээж байсан хэдэн зуун америк гэр бүлийн найдлага тасарсан байна. Уг нь сүүлийн 30 жилд хятад хүүхэд хамгийн ихээр үрчилж авдаг улс АНУ байсан юм.
БНХАУ-ын гадаад хэргийн яамны хэвлэлийн төлөөлөгч Мао Нин энэ талаараа “Хятад хүүхдүүдийг цусан төрлийн ойрын хамаатанд нь биш л бол, гадаад руу үрчлүүлэхгүй. Энэ нь олон улсын холбогдох гэрээний заалтуудтай ч нийцэж байгаа” хэмээжээ.
Үүнээс өмнө 2007 онд Бээжин хүүхэд үрчилж авахад гэр бүлүүдийн шаардлагыг амьдралын хэв маяг, нас зэргээр тусгайлан заан чангалж, мөн зөвхөн гэрлэсэн эсрэг хүйсийн хосуудад хүүхэд үрчлүүлнэ хэмээн шийдэж байсан билээ. Түүнээс хойш цар тахлын үеэр хүүхэд үрчлүүлэхийг түр зогсоож, цар тахлын дараа зөвхөн өмнө хүсэлт өгсөн гэр бүлүүдийн хүсэлтийг шийдвэрлэнэ гэдгээ мэдэгдэж байсан юм.
Эх сурвалж: RT