Японд 65 ба түүнээс дээш насныхан нийт хүн амын 30 хувийг эзэлдэг ба 65-69 насны хүмүүсийн тал хувь нь ажил хөдөлмөр эрхэлж байна гэх судалгаа гарчээ.
Японы Дотоод хэрэг, харилцаа холбооны яамнаас 15-ны өдөр нийтэлсэн хүн амын тайланд дурдсанаар, 65 болон түүнээс дээш насны хүмүүсийн тоо 36 сая 250 мянгад хүрсэн нь жилийн өмнөхтэй харьцуулахад 20 мянгаар нэмэгдэж, түүхэн дэх хамгийн өндөр үзүүлэлт болсныг онцлов. Энэ нь Японы нийт хүн амын 29.3 хувийг эзэлж буй хэрэг бөгөөд энэхүү үзүүлэлтээрээ ч мөн түүхэн дээд амжилтыг эвдсэн байна.
НҮБ-ын тооцоолсноор, Япон улс нь нийт хүн амд 65 ба түүнээс дээш насны хүмүүс хамгийн өндөр хувийг эзэлдэг орнуудыг тэргүүлсэн ба Итали (24.6%), Герман (23.2%) улсууд удаалсан талаар цохон тэмдэглэжээ. Харин 75 ба түүнээс дээш насны хүн ам 20.76 сая буюу тус улсын нийт хүн амын 16.8 хувийг эзэлж байгаа аж.
Японы нийт хүн ам энэ жил 123.76 сая болсон нь өмнөх оныхоос 590 мянгаар буурсан үзүүлэлт бөгөөд хүн амын тоо зогсолтгүй буурсаар байгаа юм.
Хүн амын хөгшрөлтийг дагаад эдийн засгийн шалтгаанаар тэтгэврийн наснаас хойш үргэлжлүүлэн ажиллаж байгаа ахмадуудын тоо ч нэмэгдэх болжээ. Өнгөрсөн онд 65-69 насны иргэдийн 52 хувь нь ажил эрхэлж байсан нь өмнөх оныхоос 1.2 пунктээр өссөн байна. Ингэснээр 65 ба түүнээс дээш насны хөдөлмөр эрхэлж буй хүмүүсийн эзлэх хувь 25.2 хувьд хүрсэн байна.
Эх сурвалж: Asiae