ОХУ-ын Ерөнхийлөгч Владимир Путин хөрш Монгол улс нь Олон улсын эрүүгийн шүүхийн тушаалаар өөрийг нь баривчилж чадахгүй гэдэгт бүрэн итгэлтэй, огт санаа зовохгүй байгаа хэмээн Кремлийн хэвлэлийн төлөөлөгч Дмитри Песков мэдээлжээ.

Путин даваа гарагт дэлхийн хоёрдугаар дайнд амь үрэгдсэн баатруудын дурсгалыг хүндэтгэхээр Монголд айлчилж байгаа билээ. Зарчмын хувьд энэ айлчлал түүний хувьд ОУЭШ-д баривчлагдах эрсдэл дагуулж байгаа юм. Учир нь ОУЭШ-ээс түүнийг дайны гэмт хэрэгт буруутган баривчлах тушаалыг Улаанбаатарт хүргүүлсэн юм.

Харин Песков энэ талаар хэвлэлд “Бид анд нөхөр Монгол оронтой маш найрсаг харилцаатай” хэмээн онцолж, ОУЭШ-ийн тушаалд Москва огт санаа зовохгүй байгаа тухай тайлбарлажээ.

Түүнээс гадна өнгөрсөн долоо хоногт Блумберг агентлагийн мэдээлснээр баттай мэдээлэл бүхий хоёр эх сурвалж Монголын засгийн газраас Путинд өөрийг нь баривчлахгүй гэх баталгаа, амлалт хүргүүлсэн хэмээжээ.

ОУЭШ-ээс 2023 оны гуравдугаар сард Путинг баривчлах тушаал гаргасан юм. Харин Москвагийн зүгээс Путинг дайны гэмт хэрэг үйлдээгүй хэмээн өмгөөлж, түүнээс гадна ОХУ ч тэр, Украин ч тэр Ромын тогтоолд нэгдээгүй учир ОУЭШ энэ хэрэгт оролцох ямар ч эрх мэдэлгүй хэмээн үзсэн байна. Гэтэл Монгол улс 2002 онд ОУЭШ-эд нэгдэн, тогтоолыг соёрхон баталсан юм.

Монголоос гадна Мексик ч мөн энэ онд шинэ Ерөнхийлөгчийн тангараг өргөх ёслолд Путин оролцохоор очиход нь саатуулах Украины шаардлагыг эсэргүүцэж байгаагаа мэдэгдсэн билээ.

Эх сурвалж: RT