Лхагва гарагт Бразил улсын цагдаагийн албанаас мэдээлснээр мягмар гарагт нэгэн эмэгтэй нас барсан хамаатныхаа цогцсыг тэргэнцэр дээр суулган банкаар үйлчлүүлж, түүний нэр дээр зээл авахаар завдсан хэрэг гарчээ.

Хэргийг тодруулбал, эмэгтэй 68 настай эрийг тэргэнцэр дээр суулган банкны салбар руу нэвтэрч, түүний нэр дээр зээл авах хүсэлтэй байгаагаа уламжилсан байна. Гэвч түүний түрж явсан тэргэнцэр дээр суусан байдалтай байсан эр үнэн хэрэгтээ амьсгал хураагаад хэдэн цаг болсон байжээ.

Теллерийн мэдэгдсэнээр бүсгүй нийт 17,000 реа буюу 3,250 ам.долларт тэнцэх хэмжээний зээлийг талийгаачийн нэр дээр авахаар завдсан гэнэ. Улмаар эмэгтэй түүний гарт үзэг атгуулж, түүнийг гарын үсэг зурж байгаа мэтээр дүр эсгэж ч үзжээ.

Хяналтын бичлэг дээр бууснаар эмэгтэй цогцос руу хандан, “Авга ах аа, та сонсож байна уу? Та гарын үсгээ зурах хэрэгтэй” хэмээж байх ба теллерт хандан, “Тэр юу ч хэлдэггүй юм аа, тэр ингээд л байж байдаг” гэснээ ахдаа хандаж, “Хэрэв та гарын үсгээ зурахгүй юм бол би таныг буцаагаад эмнэлэг хүргэе” гэсэн байна.

Гэвч банкны ажилтны зүгээс тэдний байгаа байдлыг нэг сэжигтэй байгааг анзаарахдаа цагдаа дуудахад хэргийн учир тайлагджээ.

Тийнхүү албаныхан цогцсыг моргт хүргэсэн байна.

Эх сурвалж: The Reuters