![](c/2405/8Z-OGLJ37R-O8O2Z0F-KHQVAN7-PS.jpg)
АНУ-ын засгийн газар Хятадын цахилгаан автомашины татварыг эрс нэмэгдүүлэхээр төлөвлөж байгаа ба хэрэв ингэсэн тохиолдолд Хятад улс хариу арга хэмжээ авч магадгүй гэх таамаглал үүсээд байна.
АНУ-ын Сангийн сайд Жанет Йеллен орон нутгийн цагаар 13-ны өдөр Bloomberg телевизэд өгсөн ярилцлагадаа “Бидний хийж төлөвлөж байгаа зүйлс зөвхөн бид бүгдийн санаа зовоосон асуудалд л төвлөрөх ёстой болохоос өргөн цар хүрээг хамрах ёсгүй гэж ерөнхийлөгч Жо Байден үзэж байгаа” гээд энэ удаагийн татвар нэмэх талаарх асуудал Хятадын зорилтот бүтээгдэхүүнд чиглэгдэх ёстой гэв.
Хатагтай Йеллен үргэлжлүүлэн "Хятадын тал үүнтэй холбоотойгоор томоохон хэмжээний хариу арга хэмжээ авахгүй гэж найдаж байгаа ч юу болохыг таашгүй. Энэ нь бидний хувьд хэзээд болгоомжилдог асуудал” хэмээн цохон тэмдэглэжээ.
Reuters, Wall Street Journal зэрэг АНУ-ын томоохон хэвлэл мэдээллийн хэрэгслүүдийн мэдээлснээр Жо Байдены засаг захиргаа 25 хувь байсан Хятадын цахилгаан автомашины татварыг 100 хувь болгон дөрөв дахин нэмэгдүүлэх бодлого баримтлахаар болсноо удахгүй зарлана хэмээн онцолсон байна.
Түүнчлэн цахилгаан автомашинаас гадна цахилгаан тээврийн хэрэгслийн батарей, хагас дамжуулагч, нарны эрчим хүч үйлдвэрлэх тоног төхөөрөмжийн үнэ тарифыг нэмэгдүүлэхээр болжээ.
Хятадтай худалдааны дайн хийхийг хүсч байгаа эсэхийг хатагтай Йелленээс асуухад "Бид Хятадтай эдийн засгийн харилцаагаа таслахыг хүсэхгүй байгаа ч эдийн засаг шударга байх ёстой. Хятад улс дотоодын үйлдвэрлэгчдэдээ их хэмжээний татаас олгох зэрэг шударга бус үйл ажиллагааг явуулсаар ирлээ” хэмээн дурджээ.
Эх сурвалж: MBC