Энэ жил виртуал валют, тэр дундаа Биткоины үнэ нэлээд чангарсантай холбоотойгоор дэлхийн виртуал валютын саятнуудын тоо нэг жилийн дотор 95 хувиар өсөж, оны эхний хагас жилийн эцсийн байдлаар ойролцоогоор 170,000-д хүрсэн байна.

Британийн хөрөнгө оруулалт, цагаачлалын зөвлөх компани болох Henry & Partners 2024 оны “Cryptocurrency Asset” тайландаа 6-р сарын эцсийн байдлаар 1 сая ам.доллараас дээш виртуал валют эзэмшдэг 172,300 хүн байгааг зарлав.

Эдгээр саятнуудын тал орчим хувь нь Биткоин эзэмшигчид ба Биткоин эзэмшигч саятнуудын тоо өмнөх онтой харьцуулахад 111 хувиар өсөж, 85,400 болсон нь байна.

Өнгөрсөн оны зургадугаар сард 30,000 орчим ам.доллар байсан Биткоины үнэ энэ жил огцом өсөж, өнгөрөгч гуравдугаар сард 73,000 ам.долларыг давсан удаатай. Улмаар эргэн бууж өнгөрөгч зургадугаар сарын сүүлчээр 60,000 ам.долларт хүрсэн билээ.

Криптовалюттай холбоотой Hoptrail компанийн гүйцэтгэх захирал Хенри Берроуз хэлэхдээ, өмнөх үеийнхэн хөрөнгөө голчлон хувьцаа болон үл хөдлөх хөрөнгөнд суурилан бүрдүүлдэг байсан бол өдгөө криптовалютын салбараас хөрөнгөжих үзэгдэл дэлгэрч байна хэмээн цохон тэмдэглэв.

Виртуал валют эзэмшиж буй хөрөнгөтнүүдийн тоо хурдацтай өсөх болсон шалтгаан нь АНУ-д Биткоин болон Эфириумыг ETF буюу хөрөнгийн зах зээл дээр арилжаалагддаг хөрөнгө оруулалтын бүтээгдэхүүн болгосонтой холбоотой гэж Henry & Partners дүгнэжээ.

Эх сурвалж: MBC