![](c/2405/CC-NGNN0KT-4LWZSEM-TR5H7JH-ZB.jpg)
Мэргэжлийн боксын хүнд жингийн дэлхийн үнэмлэхүй аварга цолны төлөөх тулаанд Украины боксчин Александр Усик Их Британийн тамирчин Тайсон Фьюриг яллаа.
12 үе үргэлжилсэн тулаанд Украины боксчин шүүгчдийн оноогоор ялжээ. Есдүгээр үед Усик өрсөлдөгчөө хүнд цохилтод оруулсан боловч Фьюри тулаанаа үргэлжлүүлж чадсан байна.
Энэ тулаанд ялснаар Усик Дэлхийн боксын холбоо /WBA/, Олон улсын боксын холбоо /IBF/ ба Олон улсын боксын байгууллагын /IBO/ аварга цолуудаа хамгаалж, Дэлхийн боксын зөвлөлийн (WBC) аваргын бүсийг Фьюригээс авлаа.
Өдгөө 37 настай Усик мэргэжлийн боксын рингэнд хийсэн бүх тулаандаа нэг ч ялагдаагүй бол 35 настай Фьюригийн хувьд анх удаа ялагдав.
Саудын Арабын нийслэл Эр-Рияд хотноо болсон Усик, Фьюри хоёрын тулаан хэд хэдэн удаа хойшилсон юм. Анх өнгөрсөн оны 12 дугаар сард товлосон байсан боловч Фьюри өөр тулааны дараа сэргэх хугацаа хүссэн байна. Тулааныг хоёрдугаар сард болгож хойшлуулсан ч бэлтгэлийн үеэр Фьюригийн хөмсөг задарсан тул тавдугаар сард зохион байгуулахаар дахин хойшлуулжээ. Тулааныг “Riyadh’s Kingdom Arena” цогцолборт 20 мянган хүн үзсэн байна.
Эх сурвалж: BBC /МОНЦАМЭ агентлаг/