Олон жилийн турш хөршүүд рүүгээ чавх шагайж, хэдэн арван байшингийн цонх хагалж, машины шил цуулж, хэд хэдэн хүн оносон гэх 81 настай Принц Кинг гэгчийг Калифорни мужийн Азуса хотын цагдаа нар баривчилжээ.
Цагдаа нарын мэдээлснээр иргэдийн гомдлыг удтал шалгаж, шинжилсний эцэст Кингийн гэрээс чавхны сум олноор олдсон тул түүнийг баривчилсан гэнэ. Мөн тэдний мэдээлж байгаагаар Кингийн байшингийн ойр орчмоос чавхтай холбоотой гомдол арван жилийн турш тасраагүй гэнэ.
Мөн Кингийн хувьд уйдсандаа бусдыг хорлон сахилгагүйтэж сэтгэлээ сэргээх гэснээс өөр өм хонзон гэх мэт сэдэл, шалтгаан байхгүй хэмээн албаныхан үзэж байгаа аж.
Нутгийн хэвлэл мэдээллийн хэрэгслүүдийн мэдээлснээс үзвэл Кингийг бусдын эд хөрөнгө санаатайгаар эвдэн сүйтгэсэн хэргээр шалгаж, шийтгэл оноох бөгөөд зургаадугаар сарын 17-нд товлогдсон шүүх хурал хүртэл нь түр чөлөөлсөн байна.
Эх сурвалж: BBC