Бразилын далайн эрэг дагуу амьдардаг махчин загаснуудаас кокаин илэрсэн бөгөөд энэ нь байгальд эрх дураараа амьдарч буй зэрлэг махчин загаснаас хар тамхи илэрсэн анхны тохиолдол болж байгаа тухай эрдэмтэд мэдээлжээ.

Тэд Бразилын Рио де Жанерио хотын ойролцоо далайгаас хүрц хошуут махчин загас 13-ыг барин шинжилж үзэхэд бүгдийнх нь элэг, булчингийн ширхэгээс кокаин илэрсэн байна.

Далайн эрэгтэй харьцангуй ойр амьдардаг, биеэр жижиг тус махчин загаснуудын булчингийн ширхэгээс илэрсэн кокаины хэмжээ элэгнээс илэрсэнтэй харьцуулахад гурав дахин их, тэгэхдээ эм загаснуудаас илэрсэн нь эр загаснуудынхаасаа эрс өндөр байсан гэнэ.

Кокаины хууль бус үйлдвэрлэл, хэрэглээ, тээврээрээ алдартай тус орны бохироо далайд цутгадаг дэд бүтэц, хууль бус далайн тээвэртэй энэ асуудал холбоотой гэж мэргэжилтнүүд таамаглаж байгаа юм. Мөн шинжилгээнд хамруулсан махчин загасыг төдий сайн судалсан судалгаа хомс тул кокаин тэдний эрүүл мэндэд хэрхэн нөлөөлж байгааг мэдэх боломжгүй гэнэ.

Хэдий тийм ч өмнө нь кокаин загас, дун зэрэг амьтдын эрүүл мэндэд хортой гэдгийг судалгаагаар тогтоосноос гадна тус хар тамхины тархинд нөлөөлдөг нөлөө хүнээс бусад амьтдад ч гэсэн ажиглагддаг зэргээс үзэхэд хурц хошуут махчин загасны эрүүл мэндэд хор учруулж байгаа нь дамжиггүй юм.

Үүнээс өмнө 2019 онд ИБУИНВУ-ын судлаач нар цэнгэг усны сам хорхойноос хууль бус хар тамхи илрүүлж байсан юм. Түүнчлэн 2021 онд эрдэмтэд бор трут зүйлийн загас бохир усны хоолойгоор урсаж далайд цутгасан сэтгэцэд нөлөөлөх бэлдмэлд донтох хандлагатай байгааг мэдээлсэн билээ.

Эх сурвалж: CNN