Боинг компани сүүлийн хэдэн жил үргэлж асуудал дагуулан асар их алдагдалд орсны эцэст агаарын замын ахмад туршлагатай инженерийг шинэ гүйцэтгэх захирлаараа сонгожээ.
Онгоцны цахилгаан төхөөрөмж нийлүүлэгч Роквелл Коллинсыг олон жил удирдсан Келли хочтой Роберт К Ортберг дараа сараас эхлэн ажлаа хүлээж авах гэнэ.
Харин өмнөх гүйцэтгэх захирал Дэйв Калун Аляскаас хөөрсөн шинэ онгоцны эд анги агаарт салж унаснаас болж шүүмжлэлд өртөн энэ хавар огцрохоор болсноо зарлаж байв. Гэвч зөвхөн Дэйв Калун огцорсноор олны шүүмжлэл дуусалгүй, нэмээд асар их алдагдал Боинг компанийг ниргэсэн билээ.
Энэ долоо хоногт Бонг компанийн зарласнаар тэд өнгөрсөн онд 150 сая ам.долларын алдагдалтай ажилласан бол энэ тоо энэ оны дөрөвдүгээр сараас зургаадугаар сарын хооронд хоёрхон сарын дотор 1.4 тэрбум болж өссөн гэнэ.
Шинэ захирал Ортберг бол Иовагийн уугуул, өдгөө 64 настай, 2021 онд тэтгэвэрт гарах хүртлээ салбарынхаа од явсан хүн. Тэрээр дэлхий даяар 170 мянга гаруй ажилтантай тус компанийг удирдахдаа аюулгүй байдал, чанарыг хамгийн чухалд тооцон ажиллах гэнэ.
Эх сурвалж: BBC