Парисын олимпын эмэгтэй боксын 66кг-д өрсөлдөн алтан медалийн эзэн болсон Алжирын боксчин Иманэ Хэлиф Теслагийн гүйцэтгэх захирал Илон Маск, алдарт Харри Поттерын зохиолч Ж.К.Роулинг нарыг цахим дарамт учруулсан хэргээр шүүхэд дууджээ.

Хэлифийн өмгөөлөгч Набил Будигийн мэдээлснээр, тэд дээрх хоёр хүнд Парисын прокурорын газрын цахим гэмт хэргийн тасагт гомдол мэдүүлсэн байна.

Хэдий ОУОХ-ноос түүнийг Парисын олимпод оролцохыг зөвшөөрсөн ч Хэлиф хүйсийн асуудлаас болоод маш их шүүмжлэл, дарамтад өртсөн билээ.

Хамгийн их дарамт цахим орчинд, ялангуяа Илон Маскийн Х сүлжээнд өрнөж, олны танил, алдартнууд нэгдсэнээр улам дэвэрсэн юм.

Жишээлбэл, Ж.К.Роулинг зохиолч Хэлифийн Италийн тамирчин Анжела Каринитай хийсэн тулааны зургуудыг хавсарган “Энэ бол миссогинист спортын байгууллагын ивээлд багтсанаа мэдэж, ашиглаж байгаа эр хүн. Нүүрэндээ цохиулж, асар их өвдөж, насаараа мөрөөдсөн мөрөөдөл нь замхарч байгаа эмэгтэй хүнийг харж бах таваа хангаж байна” гэж бичжээ. Түүнээс хойш мөн хэд хэдэн нийтлэлээр тэр Хэлифийг шүүмжилж байв.

Түүнээс гадна Илон Маск мөн ижил утгатай нийтлэлүүд бичиж, хуваалцжээ. Цаашлаад Доналд Трамп хүртэл “Би эмэгтэйчүүдийн спортоос эрчүүдийг бүрмөсөн хөөнө” хэмээн бичсэн аж. Иймд Хэлифийн өмгөөлөгч “Бид Доналд Трампын эсрэг ч гомдол мэдүүлнэ” гэж хэлжээ.

Эх сурвалж: Yonhap