Зэсийн үйлдвэрлэлээрээ дэлхийд тэргүүлэгч Чилийн Escondida уурхайн ажилчид ажил хаялт зарласан талаар бид өмнө нь мэдээлж байсан билээ. Тэгвэл тус уурхайн ажилчид ажил хаялтаа зогсоож, ажилдаа эргэн орохоор шийдсэнээр дэлхийн зах зээл дээрх зэсийн үнэ тогтворжих төлөвтэй байна.

Reuters агентлагийн орон нутгийн цагаар 18-ны өдөр мэдээлснээр, Австралийн BHP Billiton компани дийлэнх хувьцааг нь эзэмшдэг Escondida уурхайн ажилчдын үйлдвэрчний эвлэлийн холбоо удирдлагатай хэлэлцээ хийсний үндсэн дээр өнгөрсөн долоо хоногт 72 цаг үргэлжилсэн ажил хаялтыг зогсоох шийдвэр гаргажээ.

Тус компани үйлдвэрчний эвлэлийн гишүүдэд урамшуулал болон бусад мөнгөн тэтгэмж хэлбэрээр 32 сая орчим Чили песо буюу монгол мөнгөөр 100 гаруй сая төгрөг өгөх урьдчилсан тохиролцоонд хүрсэн гэж орон нутгийн хэвлэлүүд мэдээлэв.

Тус уурхайн үйлдвэрчний эвлэлд нийт ажилчдын 88.3 хувь буюу 2376 ажилтан харьяалагддаг аж.

Escondida уурхайн ажил хаялтын улмаас тогтворгүй болох шинж тэмдэг илэрч байсан ирэх 3 сарын зэсийн фьючерсийн үнэ тогтворжих төлөв ажиглагдсан байна.

Тухайлбал нийлүүлэлт тасалдсанаас болж өнгөрсөн долоо хоногт анх удаа гурван хувиар өссөн Лондонгийн металлын бирж дээрх гурван сарын хугацаатай зэсийн үнэ 16-ны өдөр тонн нь 9128 ам.долларт хүрсэн юм.

Эх сурвалж: MBC