Эрдэмтдийн судалж нотолсноор жимсний эр ялаа эмэгчнээ тойрон нисэж, үржилд уриалан дуудахад тархин дахь дофамин дааврынх нь хэмжээ огцом өсөж, улмаар аюулыг илрүүлэх харааны чадварыг нь дарангуйлан аливаа амьтанд бариулах эрсдэлд оруулдаг гэнэ.
Судалгааг Бирмингхэмийн их сургуулийн профессор Каролина Рэзабал ахлан хийсэн бөгөөд энэ сарын 29-нд шинжлэх ухааны Nature сэтгүүлд тайлангаа нийтлүүлсэн байна.
Судлаач нар хоёр фотонт микроскоп ашиглан жимсний эр ялааны тархиндямар нейрон идэвхжиж байгааг ажигласан байна. Түүнчлэн туршилтын үед гэрэл, сүүдэр ашиглан ялаа барьдаг шувуу ойрхон нисэж байгаа мэт үзэгдэл ч үзүүлсэн гэнэ.
Үр дүнд нь эр ялаа эмээ эргүүлж эхэлж байх үедээ аюулыг анзаармагц серотонин даавар давамгайлж, эм ялаа эргүүлэх ажлаа болин амиа бодох шийдвэрт хүргэж байсан бол, эргүүлэх үйл явц ид дундаа, эсвэл үржил эхэлсэн хойно аюул үзүүлэхэд дофамин даавар тархинд ихээр ялгарснаас болж аюулыг таних харааны чадвар алдагдаж, амиа аврахаас илүү үржилдээ төвлөрч байсан аж.
Судалгааны багийн эрдэмтдийн тайлбарлаж байгаагаар жимсний эр ялааны энэ байдал хүнийхтэй төстэй байгаа гэнэ. Жишээлбэл, ууланд авирч байгаа хүн уулын оргилд ойртох тусам цаг агаар болон бусад ноцтой аюулыг улам ихээр үл тоож, үл анзаарч, оргилд гарахыг л тэмүүлсээр байдаг билээ.
Эх сурвалж: Yonhap