Газын зурваст барьцаалагдсан иргэдийг суллах гэрээ байгуулах чиглэлд хүчин чармайлт гаргахыг шаардаж буй Израилын хамгийн том үйлдвэрчний эвлэл “Израилын эдийн засгийг бүхэлд нь зогсооно” хэмээн мэдэгдэж, бүх нийтийн ажил хаялт зарлажээ.

Үүнтэй холбоотойгоор Тель-Авивын олон улсын нисэх буудал орон нутгийн цагаар өглөөний 8 цагаас эхлэн хоёр цагийн турш нисэх, буух нислэгийг хүлээн авахгүй байхаар шийдвэрлэсэн байна.

Өнгөрсөн амралтын өдрүүдэд Израилын цэргийнхэн Газад барьцаалагдаад байсан зургаан хүний ​​цогцсыг олсны дараа эсэргүүцлийн жагсаал өрнөжээ. Жагсагчид Израилын Ерөнхий сайд Беньямин Нетаньяхуг барьцаалагдсан хүмүүсийг хамгаалах тал дээр хангалттай зүйл хийгээгүй гэж үзэж байгаа нь ХАМАС бүлэглэлтэй гал зогсоох хэлэлцээр байгуулахыг шаардаж буй шахалтыг улам нэмэгдүүлж байна.

Газын зурваст амь үрэгдсэн барьцааны хүмүүсийн гурвыг, түүний дотор Израил-Америкийн иргэн Херш Голдберг-Полиныг гал зогсоох хэлэлцээрийн дагуу суллах төлөвтэй байсан гэж АНУ, Израилын холбогдох албаны төлөөлөгчид мэдэгджээ.

Өдгөө хэлэлцээр улам ээдрээтэй болоод байгаа бөгөөд АНУ-ын үндэсний аюулгүй байдлын зөвлөх мэдэгдэхдээ, ХАМАС бүлэглэлийнхний барьцаанд байгаа хүмүүсийг суллахад “ойрын хэдэн өдөр маш чухал байх болно” гэлээ. АНУ-ын Ерөнхийлөгч Жо Байден уг гэрээг байгуулахаар хэлэлцээ хийж буй АНУ-ын багтай өнөөдөр уулзах ажээ.

Эх сурвалж: МОНЦАМЭ