Украины гадаад хэргийн яам ОХУ-ын Ерөнхийлөгч Владимир Путинг Улаанбаатарт газардмагц нь баривчилж Олон улсын эрүүгийн шүүхэд тушаагаагүйнхээ хариуг монголчууд гашуунаар амсана хэмээн заналхийлжээ.

Монголд хийж буй энэ удаагийн айлчлал бол Путины хувьд ОУЭШ өөрийг нь баривчлах шийдвэр гаргаснаас хойш тус байгууллагын гишүүн оронд зочилж буй анхны тохиолдол юм. Эргэн санавал, ОУЭШ өөрийн 124 гишүүн оронд Путин хэрэв айлчлах юм бол газар дээр нь баривчлах заавар өгсөн билээ. Харин Кремлийн хэвлэлийн төлөөлөгч Дмитри Песков “Монголчууд Путинг баривчилж чадахгүй. Манай хоёр улс эв найрамдалтай учир шүүхийн шийдвэрийг биелүүлнэ гэж огт санаа зовохгүй байна” гэж мэдэгдсэн тухай бид өмнө мэдээлсэн билээ.

Тэгтэл Путин Улаанбаатарт газардсаны дараа Украинын гадаад хэргийн яамны хэвлэлийн төлөөлөгч Георгий Тыхи өөрийн цахим хуудаснаа “Монголын засгийн газар Путинг баривчлах тушаал биелүүлж чадаагүй явдал бол ОУЭШ болон олон улсын эрүүгийн тогтолцоонд маш том гутамшиг. Монгол дайны гэмт хэрэгтнийг хоохойлон орогнуулснаараа өөрсдөө ч бас дайны гэмт хэрэгтэн болж байна. Бид холбоотнуудтайгаа хамтран Улаанбаатарт шанг нь хүртээх бүх арга хэмжээг авна” хэмээжээ.

ОУЭШ Монголыг тушаалыг нь биелүүлээгүйн төлөө буруутгаж болох ч гэлээ, албан ёсоор торгууль ноогдуулах, хориг тавих болон бусад шийтгэл оноох эрхгүй юм. Түүнчлэн ОУЭШ шийдвэрээ албадан биелүүлэх эрх мэдэлгүй бөгөөд зөвхөн гишүүн орнуудынхаа сонголт, дуулгавартай байдалд түшиглэдэг билээ.

Түүнээс гадна ОХУ, Украин аль аль тал нь 1998 онд ОУЭШ-ийг үүсгэн байгуулсан Ромын тогтоолд гарын үсэг зурж нэгдээгүй юм. Украины парламент өнгөрсөн сард уг тогтоолыг соёрхон баталсан ч Украины иргэдтэй холбоотой хэргийн шүүхийн харьяаллыг хүлээн зөвшөөрөхгүй гэсэн заалт оруулсан аж.

ОУЭШ 2023 оны гуравдугаар сард Путин болон ОХУ-ын Хүүхдийн эрхийн комиссар Мария Львова нарыг Украины эзэмшилд орсон газар нутгаас хүүхдүүдийг хууль бусаар нүүлгэн шилжүүлсэн хэмээн гэм буруутайд тооцон, баривчлах тушаал гаргасан юм. Харин Москвагийн зүгээс дайсны аюул нүүрлэсэн тулааны талбараас энгийн иргэдээ нүүлгэн шилжүүлснийг гэмт хэрэгт тооцох нь солиотой хэрэг хэмээн эсэргүүцэж байгаа юм.

Эх сурвалж: RT