ОХУ-ын Гадаад хэргийн яамны төлөөлөгч Мария Захарова мягмар гарагт “Тайвань Бээжинг Оросоос “булаалгасан” газар нутгаа ав гэж байхын оронд эхлээд өөрсдөө тайван замаар нэгдэх тал дээр анхаарч байсан нь дээр” хэмээн ярьжээ.

Тухайлбал, өнгөрсөн амралтын өдрөөр Тайванийн Ерөнхийлөгч Лай Чин Тэ “Тайванийг нэгтгэх гэсэн Бээжингийн санаархал газар нутагтаа биш, хэрэв газар нутгийн санаархал байгаа юм бол эхлээд Айгүний гэрээгээр Орост булаалгасан газар нутгаа эргүүлж авах хэрэгтэй, одоо л Орос хамгийн сул дорой дээрээ байна” хэмээн ярьсан билээ.

Сануулахад, тэртээ 1858 онд Хятадын Чин гүрэн болоод Оросын эзэнт гүрэн хооронд байгуулсан Айгүний гэрээний дагуу тухайн үеийн Чин гүрний эзэмшилд байсан Амар мөрний сав газар буюу өнөөгийн хоёр улсын хилийн ихэнхийг хамарсан газар нутаг Оросын эзэмшилд очсон билээ.

Ерөнхийлөгч Лайн дээрх үгний хариуд Мария Захарова “Хэн нэг улс төрчийн үзэл бодол зарим хүмүүст сонирхолтой санагдаж магадгүй. Гэхдээ бидэнд хамаагүй. Америкийн нөлөөнд автсан Лай ийм сэдэв хөндсөнөөр өөртөө ч, ард түмэндээ ч сайн зүйл авчрахгүй. 2001, 2004 оны хамтын ажиллагаа, улсын хилийн тухай хоёр талын гэрээ болон бусад баримт бичигт тусгагдсаны дагуу Орос, Хятад хоёр улс газар нутгийн бүх болзошгүй маргаанаас татгалзсан гэдгийг Тайпэй санах нь зүйтэй. ОХУ-ын зүгээс “Нэг Хятад” бодлогыг ямагт дэмжиж байгаа бөгөөд БНАХАУ-ын засгийн газар бүх Хятадыг захирах бүрэн эрхтэй гэж үзэж байна. Илүү сэдэв хөндөхийн оронд Тайвань дотоодын эдийн засгийн асуудалд санаа зовж, Бээжингийн саналыг хүлээн авч, тайван замаар нэгдэх талаа бодсон нь дээр. Бидний анд нөхөр Бээжин ч ижил саналтай байгаа гэдэгт бид итгэлтэй байна” гэжээ.

Эх сурвалж: RT