Италичууд 14 нас хүрээгүй хүүхэд гар утас эзэмшихийг, 16 нас хүрээгүй хүүхэд нийгмийн цахим сүлжээнд нэвтрэхийг хориглох тухай цахим санаачилга гаргаж, олон нийтээс эерэг хариу хүлээж байна.

Тухайлбал, дэлхийн цахим санал хураалтын хамгийн том “change.org” хуудсанд энэ сарын 10-нд нийтлэгдсэн “Ухаалаг утас ба цахим сүлжээ: бүх технологид өөр өөрийн хугацаа гэж бий” нэртэй санал хураалтад Италийн өндөр албан тушаалтнууд олноор гарын үсэг зуржээ.

Санал хураалтыг боловсролын салбарын мэргэжилтэн, сэтгэл судлаач Алберто Филай ахалж, кино найруулагч Паола Кортелеси, жүжигчин Алба Рохвашер, Стефано Аккорси, Лука Зингаретти нар дэмжжээ.

Түүнээс гадна боловсрол, соёл, урлаг, сэтгэл судлалын салбарын олон эрдэмтэн, мэргэжилтэн болон оюутнууд дээрх санаачилгыг олноор дэмжиж эхэлсэн талаар эх сурвалжууд мэдээлсэн байна.

Санал хураалтад тайлбарласнаар “Ухаалаг утасны уршгийг сургуулийн сурагчдаас бодитоор ажиглаж болно. Ухаалаг утас оруулахыг хориглодог сургуулийн сурагч нар үе тэнгийнхэнтэйгээ илүү их харилцаж, хамт цагийг өнгөрөөж, хөгжилдөн суралцдаг. Цаашлаад бага насны хүүхдийн тархи сэтгэхүйг, олон нийтийн цахим сүлжээ хордуулж, гэмтээж байна” гэж бичсэн байна.

Түүнчлэн санаачилгыг эхлүүлсэн хүмүүсийн нэг Новора гэгч нутгийн сонинд “Бага насны хүүхдийн согтууруулах ундаа, тамхины хэрэглээг хязгаарладагтай яг ижил байдлаар ухаалаг утас, цахим сүлжээг хязгаарлах хэрэгтэй. Бид технологийн хөгжлийг эсэргүүцэх гэсэнгүй. Гэхдээ бага насны хүүхдэд ухаалаг утас өгөх нь тэднээр машин жолоодуулж байгаагаас ялгаагүй. Асуудал бодит байгааг хүн бүр мэдэж байгаа. Үүнийг өөрчлөх анхны улс нь Итали байгаасай” хэмээн ярьжээ.

Эх сурвалж: Yonhap