БНАСАУ-ын удирдагч Ким Жон Ун цөмийн хүчээ АНУ болон түүний холбоотнуудтай дайтахад бүрэн бэлтгэх ажлыг хоёр дахин эрчимжүүлж, шинэ, илүү хөнөөлтэй баллистик пуужингуудынхаа тоог нэмнэ хэмээн төрийн мэдээллийн агентлагаараа дамжуулан зарлажээ.
Ким Жон Ун үүнтэй төстэй заналхийлэл дандаа хэлдэг ч ажиглагчдын үзэж байгаагаар энэ удаагийн сануулга нь тэд Америкийн Ерөнхийлөгчийн сонгуулиас өмнө хэд хэдэн туршилт хийж амжуулах гэж байгаагийн дохио байж магадгүй юм гэнэ.
Тэрээр даваа гарагт засгийн газрынхаа 76 жилийн ойг тэмдэглэх ёслолын арга хэмжээн дээр үг хэлэхдээ АНУ-ын ханаж цадахаа мэддэггүй тэлэх бодлого цэрэг армийн тал дээр хаа сайгүй тарж, улмаар цөмийн пуужингаа ч олон улсад байршуулж эхэлсэн нь Умард Солонгосын хувьд ноцтой аюул мөн хэмээн ярьсан аж.
Иймд тэрээр хэзээд байлдахад бэлэн байхын тулд цөмийн пуужингуудаа хоёр дахин бэлэн байлгахын төлөө хичээн ажиллахаа амласан байна.
Шинжээчдийн таамаглаж байгаагаар 2022 оноос хойш пуужингийн туршилтаа эрс эрчимжүүлсэн Пёнян технологийн хувьд дэвшилд хүрч, АНУ-ын эх газарт хүрэх алсын тусгалтай цөмийн пуужин бүтээх аргаа олсон байж мэдэхээр байгаа юм. Өдгөө тэдний эзэмшиж байгаа пуужингууд Өмнөд Солонгос, Японд хүрэх чадалтай юм.
Засгийн газрын ойг тэмдэглэсэн ямар нэг үйл ажиллагаа, зэвсгийн туршилт одоогоор болоогүй байгаа ч Пёняны сонинд Ким Жон Ун пуужингийн үйлдвэрээр зочилж, Умард Солонгост урьд байгаагүй хамгийн том пуужинтай танилцлаа хэмээн бичсэн байна.
Эх сурвалж: AP