Норвегийн хөлбөмбөгчин Эрлинг Холанд “Манчестер Сити” клубт тоглохдоо энэ улиралд 27 гоол оруулснаар Премьер лигийн “Алтан шаахай” шагналыг хоёр улирал дараалан хүртлээ.

Ням гарагт ситичүүд “Этихад” цэнгэлдэх хүрээлэндээ “Уэст Хэм”-ийг 3:1-ийн харьцаагаар буулган авснаар улирлын сүүлчийн тоглолтоо “Эвертон”-ы эсрэг хийсэн “Арсенал”-аас хоёр оноогоор илүүрхэж, дөрөв дэх удаагаа дараалан лигийн аварга болжээ.

Э.Холанд 36 удаа гоол оруулсан өмнөх улирлын амжилтаа давтаж чадаагүй хэдий ч энэ улиралд 27 гоол оруулснаар “Алтан шаахай”-н төлөөх өрсөлдөөнд Коул Палмерыг /22/ төвөггүй ардаа орхисон байна.

Норвегийн хөлбөмбөгчний энэ улиралд хийсэн зарим тоглолт шүүмжлэлд өртөж байсан бөгөөд “Манчестер Юнайтед”-ын ахлагч асан Рой Кин дөрөвдүгээр сард “Сити” баг “Арсенал”-тай гоол оруулж чадалгүй тэнцсэний дараа түүнийг “2-р лигийн тоглогч” гэж нэрлэж байлаа.

Харин “Сити”-гийн менежер Пеп Гвардиола дээрх үгийн хариуд хэлэхдээ, Э.Холанд бол “дэлхийн хамгийн шилдэг довтлогч” хэмээн магтаж байсан юм.

Эх сурвалж: ESPN /МОНЦАМЭ агентлаг/