Аялал жуулчлалын улирлын оргил үе эхлэх гэж байгаатай холбогдуулан Италийн Венец хот халаасны хулгайчдын эсрэг дайн эхлүүлжээ.

Орон нутгийн өдөр тутмын Corriere della Sera сонины 28-ны өдөр мэдээлснээр, Венецийн хууль сахиулагчид энэ он гарсаар халаасны хулгайн хэргээр зургаан хүнийг баривчилснаас гадна тус хотоос албадан гаргах тушаалыг 14 удаа гаргасан байна. Өнгөрсөн оны нэгдүгээр сараас тавдугаар сарын хооронд албадан гаргах тушаал хоёрхон удаа гаргаж байсантай харьцуулахад энэ нь эрс ихэссэн үзүүлэлт болжээ.

Тэрчлэн өнгөрөгч 25-ны өдөр "Сэрэмжтэй иргэд" иргэний нийгмийн бүлгэмийн зүгээс 90 халаасны хулгайчийн зураг бүхий лоозон барин Санта Люсиа өртөөнд жагсаж олны анхаарлыг татсан байна. Энэ бүлгэмд 30 гаруй жил идэвхтэй ажилласан, хотын зөвлөлийн гишүүн асан Моника Фоли халаасны хулгайчдын нүүр царайг ил гаргах нь хувийн нууцад халдаж буй явдал гэх шүүмжлэлийг эрс үгүйсгэж, "Хулгай хийж байна гэдэг нь ч хувийн нууцад халдаж байгаа хэрэг" хэмээн цохон тэмдэглэв.

Халаасны хулгайчидтай ийнхүү эрчимтэй тэмцэж эхэлсний гол шалтгаан нь Венецид нэгэн эмэгтэй хулгай хийж олсон мөнгөө хуримтлуулан үл хөдлөх хөрөнгө болон газар худалдаж авсан нь саяхан мэдэгдэж, орон нутгийн иргэдийн зэвүүцлийг хүргэсэнтэй холбоотой.

Тухайн эмэгтэй танихгүй хүмүүсийг таньдаг царайлан тэвэрч аван улмаар зүүлт, цаг, хэтэвч зэргийг нь хулгайлдаг нь тогтоогдсон байна. Татварын албанд ямар ч орлогогүй гэж мэдүүлэх хэрнээ өндөр үнэтэй үл хөдлөх хөрөнгө худалдаж авч байгаа нь хууль сахиулагчдын хараанд өртсөнөөр, мөрдөн байцаалтын ажиллагаа явуулж барьж авчээ.

Өнгөрсөн долоо хоногт Венецийн шүүх хэрэгтэнд нэг жил зургаан сарын тэнсэн харгалзах ял оноож, 200 мянган еврогоор үнэлэгдэх хөрөнгийг нь хураах шийдвэр гаргасан байна. Түүнчлэн шүүхийн шийдвэрийн хүрээнд тухайн эмэгтэй тодорхой хугацаанд гэрийн хорионд байх ба тогтвортой ажлын байр олох ёстой гэж Corriere della Sera сонин нэмэлт тайлбар хийжээ.

Эх сурвалж: JoongAng