Хятадын дахин ашиглах зориулалт бүхий сансрын хөлөг энэ сарын 24-ний 15 цагийн үед тойрог замд дахин нэг үл мэдэгдэх биет хаясныг АНУ-ын сансрын хүчин ажиглаж байгаа талаар сансар судлаач Жонатан МакДоуэлл өөрийн цахим хуудаснаа мэдээлжээ.

Тэрээр “тус үл мэдэгдэх биет хятадын дэд хиймэл дагуул, эсвэл хөлөг дэлхийд буцахаас өмнө ангижирч буй ашиггүй болсон хэсэг аль нь ч байж магадгүй. Тус хөлөг анх сансарт гарахдаа мөн ижил үл мэдэгдэх биет тойрог замд хая байсан” хэмээн бичжээ.

Тус хөлөг арван хоёрдугаар сарын 14нд Жиүчуан төвөөс Лонг Марч 2F тээвэрлэгч пуужингийн тусламжтай сансарт хөөрсөн бөгөөд тэр даруйдаа янз бүрийн дохио бүхий зургаан биет тойрог замд хаясан юм. МакДоуэллийн үзэж байгаагаар энэ долоо хоногт тойрог замд дахин нэг биет хаясан нь тухайн хөлөг 164 хоногийн даалгавраа дуусгаад харихаар зэхэж байгаагийн тэмдэг байж магадгүй гэнэ.

Уг хөлгийг иргэний болон цэргийн зориулалттай сансрын хөлөг бүтээх зорилго бүхий Хятадын төрийн үйлдвэр Сансрын хөлгийн технологийн академи бүтээсэн аж. Хөлгийн анхны загвар 2020 онд сансарт хөөрч, тойрог замд ердөө хоёр хоноод харьсан бол дараагийнх нь 2022 онд хөөрч, тойрог замд 276 хоносон билээ.

Өмнөх хоёр удаагийн ажиллагаагаараа ч гэсэн хятадын сансрын хөлгүүд зорилго, шалтгааныг нь тодорхой мэдэгдэлгүйгээр тойрог замд олон үл мэдэгдэх биет хаяж байсан юм. Угаасаа ч тэд эл хөлгүүдийнхээ тухай аль болох нууцалж байгаа аж.

Эх сурвалж: Gizmodo