Аялахад хамгийн аюулгүй хотын жагсаалтыг Сингапур тэргүүлсэн бол Каракас (Венесуэл) сүүл мушгижээ.

24-ний өдөр Америкийн бизнес мэдээллийн Forbes сэтгүүлийн дэргэдэх хэрэглэгчдийн мэдээллийн зөвлөх платформоос дэлхийн 60 том хотын дундаас Сингапурыг аялахад хамгийн аюулгүй газраар шалгаруулсан байна.

Тус платформын зүгээс гэмт хэргийн гаралт, хувь хүний ​​аюулгүй байдал, хотын дэд бүтэц, эмнэлгийн үйлчилгээний чанар, байгалийн гамшиг, дижитал аюулгүй байдлын эрсдэл зэрэг хүчин зүйлсийг харгалзан хот бүрт 0-100 хүртэлх аюулгүй байдлын оноо өгөх журмаар шалгаруулсан аж. Оноо бага байх тусам эрсдэл багатай гэж ойлгож болно.

Сингапур 100-аас 0 оноо авснаар хамгийн аюулгүй хот болжээ. Хоёр, гуравдугаар байрт Токио (10,72 оноо), Торонто (13,6 оноо) хотууд шаргарсан байна. Сидней (Австрали) 4-т, Цюрих (Швейцарь) 5-т, Копенгаген (Дани) 6-р байранд оржээ.

Нөгөөтэйгүүр, аялагч, жуулчдын хувьд хамгийн аюултай хотоор Венесуэлийн Каракас шалгарсан аж. Тодруулбал тус хот 100 оноо авсан цорын ганц хот болсон юм. Өнгөрсөн жил АНУ-ын Төрийн департаментаас Венесуэлийн аялал жуулчлалын түвшинг 4-р түвшин (аялал хийхгүй байх) буюу хамгийн дээд түвшин болгон нэмэгдүүлсэн билээ. Учир нь Каракас хотод хүн амины хэрэг байнга гардаг тул "Үхлийн хот" гэж нэрлэгдэх нь ч бий.

Тэгвэл хамгийн аюултай хотын хоёрдугаарт эрэмбэлэгдсэн газар бол 100 онооноос 93.12 оноо авсан Пакистаны Карачи хот юм. Эдгээр хотуудыг гэмт хэрэг, террорист заналхийлэл, эдийн засгийн эмзэг байдал, тэр байтугай байгалийн гамшиг зэргээс шалтгаалан хувь хүний аюулгүй байдлын эрсдэл өндөртэй гэж үзжээ.

Мөн Мьянмарын Янгон (91.67 оноо), Нигерийн Лагос (91.54 оноо), Филиппиний Манила (91.49 оноо) зэрэг хотууд өндөр оноо авсан байна. Мьянмарын хувьд дижитал аюулгүй байдлыг хамгийн эрсдэлт хүчин зүйл гэж нэрлэжээ. Учир нь цэргийнхэн интернетийн хэрэглээг хянаж, харилцаа холбооны сүлжээний хэрэглэгчдэд хяналт тавьж байгаатай холбоотой бололтой.

Эх сурвалж: Maeil