Туркийн Ерөнхийлөгч Р.Т.Эрдоган 1979-2003 онд Иракийг удирдаж байгаад 2006 онд цаазлуулсан Саддам Хусейний хувь заяаг давтаж магадгүй гэж Израилын Гадаад хэргийн сайд Исраэль Кац үзэж байна.

Турк улс Израил руу халдан нэвтрэхийг үгүйсгэхгүй гэсэн утгатай үгийг Туркийн удирдагч хэлсний хариуд Израилын сайд дээрх мэдэгдлийг хийсэн байна.

“Эрдоган Саддам Хусейний араас орж, Израилд халдан довтлохоор заналхийлж байна. Тэнд юу болсон, бүх зүйл хэрхэн төгссөнийг түүнд сануулмаар байна” гэж Кац Х нийгмийн сүлжээний хуудсандаа бичжээ. Тэрбээр энэ мэдэгдэлдээ хоёр гэрэл зургийг хавсаргасан байна. Эхний гэрэл зурган дээр Эрдоган нарны шил зүүгээд, Палестин ба Туркийн далбааны өнгөтэй хүзүүний ороолттой байсан бол нөгөө фото зурган дээр сахал нь ургаж, үс нь сэгсийсэн С.Хусейн харагдана. Энэ бол 2003 онд Америкийн цэргүүд Хусейнийг баривчилсны дараа авсан гэрэл зураг юм.

28-ны өдөр Эрдоган мэдэгдэхдээ, Турк улс тухайн цаг үедээ Уулын Карабах ба Ливид нэвтрэн орж байсны адилаар Израилд нэвтрэн орж магадгүй гэсэн ажээ.

2023 оны 10 дугаар сард Израил-Палестины мөргөлдөөн эхэлснээс хойш Израил-Туркийн харилцаа эрс хурцадсан бөгөөд 10 дугаар сарын сүүлчээр Израилын ГХЯ дипломат ажилтнуудаа Анкарагаас эргүүлэн дуудсан бол Туркийн тал мөн Тель-Авиваас элчин сайдаа татсан юм.

Эх сурвалж: МОНЦАМЭ