Өнгөрсөн оны арванхоёрдугаар сард дефолт зарласан Этиоп улс Олон улсын валютын сангаас (ОУВС) 4 жилийн хугацаатай 3.4 тэрбум ам.долларын тусламж олгох зөвшөөрлийг авчээ.

Этиопын төрийн мэдлийн мэдээллийн агентлаг ENA-гийн орон нутгийн цагаар 30-ны өдөр мэдээлснээр, ОУВС өмнөх өдөр нь Удирдах зөвлөлийн хурлаа хийж, Этиоп улсад олгох өргөтгөсөн зээлийн хөтөлбөрийг баталсан байна. Энэхүү шийдвэрийн хүрээнд ОУВС ойрын хугацаанд 1 тэрбум ам.долларыг тус улсад олгохоор болжээ.

Энэ нь инфляцын өндөр түвшин, гадаад валютын архаг хомсдолд нэрвэгдсэн Этиопын засгийн газрын зээл, татаас, өрийн бүтцийн өөрчлөлтөөр дамжуулан босгох гэж буй 10.7 тэрбум ам.долларын нэг хэсэг аж.

Этиоп улс өнгөрсөн жилээс эхлэн ОУВС-тай санхүүгийн тусламж авах талаар хэлэлцээр хийж байсан билээ.

Үүнээс гадна валютын зах зээл дэх төрийн оролцоог хаахын тулд зах зээлийн гүйлгээнд суурилсан хөвөгч ханшийн системийг нэвтрүүлэх зэргээр эдийн засгийн шинэчлэлийн өргөн хүрээтэй хөтөлбөрүүдийг мөн хэрэгжүүлэхээр болсон байна.

Өмнөх өдөр нь Этиопын Төв банкны зүгээс энэ тухай олон нийтэд зарласны дараахан тус улсын үндэсний мөнгөн тэмдэгтийн нэг ам.доллартай харьцах ханш 23 хувиар буурчээ.

ОУВС-гийн гүйцэтгэх захирал Кристалина Георгиева хэлэхдээ, "Энэ бол Этиопын хувьд чухал мөч. Дөрвөн жилийн хугацаатай өргөтгөсөн зээлийн системээр дамжуулан хөгжлийн түншүүд болон зээлдүүлэгчдээс нэмэлт гадаад санхүүжилтийг татах ба өрийн бүтцийн өөрчлөлтийг амжилттай өндөрлүүлэх тогтолцоог бүрдүүлнэ” хэмээн цохон тэмдэглэсэн байна.

Эх сурвалж: Yonhap