Хятад, Европыг холбосон ачааны галт тэрэгний үйл ажиллагаа өнгөрөгч нэгдүгээр сараас долдугаар сар хүртэл өмнөх онтой харьцуулахад 12 хувиар өссөн тооцоо гарчээ. Энэхүү өсөлт нь нийлүүлэлтийн сүлжээг тогтворжуулахад тусална гэж Хятадын орон нутгийн хэвлэлүүд дүгнэсэн байна.
Тодруулбал Хятадын төрийн мэдлийн Global Times сонин 11-ний өдөр Хятадын төмөр замын нийтэлсэн тоо баримтаас иш татан, энэ оны нэгдүгээр сараас долдугаар сар хүртэл Хятад-Европыг холбосон галт тэрэгний тоо 11.403 болсон нь өнгөрсөн оны мөн үеийнхээс 12 хувиар нэмэгдсэн үзүүлэлт болсныг дурдав. Түүнчлэн эдгээр галт тэрэг TEU (20 тонн хэмжээтэй) хэмжээ бүхий 1.22 сая чингэлэг тээвэрлэсэн нь өмнөх оныхоос 11 хувиар өссөн үзүүлэлт болжээ.
Түүнчлэн өнгөрөгч долдугаар сарын байдлаар 1776 галт тэрэг зорчоод байгаа ба энэхүү хэмжээ өнгөрсөн тавдугаар сараас хойш гурван сар дараалан 1700-аас даваад байгаа юм.
Шанхай дахь хангамжийн сүлжээний удирдлагын EPU компанийн гүйцэтгэх захирал Томми Тан Global Times сонинд хэлэхдээ “Ачааны галт тэрэгний салбар энэ жил ойролцоогоор 5 хувиар өссөн” гээд хэтийн төлөв өөдрөг байгаа талаар сэтгэгдлээ илэрхийлсэн байна. Түүний удирддаг компани Францын Лион, Унгарын Будапешт зэрэг Европын хэд хэдэн хот руу галт тэргээр ачаа тээвэрлэдэг аж.
Улаан тэнгисийн хямралын улмаас холуур тойрч явахаас аргагүй болсон далайн замтай харьцуулахад төмөр замын тээвэр илүү өрсөлдөх чадвартай болсныг салбарын мэргэжилтнүүд онцолсныг тус сонин өгүүлэв.
Эх сурвалж: Asiae