Тайланд улс хилийн чанадад өндөр технологийн салбарт ажиллаж буй өөрийн орны чадварлаг нарийн мэргэжилтнүүдээ эргүүлэн татахын тулд татварыг эрс бууруулахаар шийджээ.
Bloomberg News агентлагийн 31-ний өдөр мэдээлснээр, Тайландын засгийн газар цахилгаан бараа, автомашин, робот, нисэх зэрэг технологийн салбарт ажиллаж буй мэргэжилтнүүдээ эх орондоо эргүүлэн татахын тулд татварыг бууруулах төлөвлөгөөг баталсан талаар онцолсон байна.
Тодруулбал гадны орнуудад ажиллаж байгаад эх орондоо эргэн ирж буй нарийн мэргэжилтнүүд ойрын таван жилийн хугацаанд ердөө 17 хувийн орлогын албан татвар төлөхөөр болж буй аж. Энэ нь жилийн 5 сая бат ба түүнээс дээш орлоготой Тайландчуудын төлдөг 35 хувийн орлогын албан татварын талд нь ч хүрэхгүй байна гэсэн үг юм.
Татварын хөнгөлөлтөд хамрагдах хүмүүс бакалавр ба түүнээс дээш зэрэгтэй, гадаадад хоёроос доошгүй жил ажилласан туршлагатай байх шаардлагатай гэнэ. Засгийн газрын зүгээс тэднийг ажилд авсан компаниудад ч хөнгөлөлт үзүүлэхээр төлөвлөжээ.
Эрх баригчид энэхүү шийдвэрээр дамжуулан хамгийн багадаа 500 нарийн мэргэжилтнийг эх орондоо эргэж ирнэ гэж найдаж байгаа бөгөөд үүнээс үүдсэн татварын алдагдал 120 сая батад хүрнэ хэмээн таамаглаж байгаа аж.
Тус улсын Сангийн дэд сайд Паопом Лотьянасакул “Бид Тайландад нарийн мэргэжлийн боловсон хүчнүүдийг авчирч, эх орныхоо эдийн засгийг хөгжүүлэхийг хүсэж байна. Гол гол салбарууд хөгжихийн хэрээр татварын орлого ч цаашид нэмэгдэнэ” хэмээн цохон тэмдэглэсэн байна.
Экспортын хэмжээ буурч байгаагаас гадна, айл өрхүүдийн өрийн хэмжээ нэмэгдэж буй зэргээс шалтгаалан сүүлийн үед тус улсын эдийн засагт багагүй хүндрэл тулгараад байгаа юм. Тухайлбал өнгөрсөн оны дотоодын нийт бүтээгдэхүүний өсөлт ердөө 1.9 хувьтай байжээ.
Өнгөрсөн жил ажлаа хүлээн авсан одоогийн ерөнхий сайд Тета Тависин нь бизнес эрхлэгч байсан бөгөөд өөрийгөө "борлуулалтын ажилтан” хэмээн нэрийдэж, эдийн засгийг сэргээхийг нэн тэргүүнд тавьсан боловч төдийлөн үр дүнд хүрээгүй хэмээн шинжээчид шүүмжилдэг.
Хөдөлмөрийн насныхан хөгширч байгаагийн улмаас Тайландын аж үйлдвэрийн салбарын өрсөлдөх чадвар суларч байгаа бол өндөр технологийн салбар ч мэргэжлийн боловсон хүчний хомсдолд ороод байгаа юм.
Эх сурвалж: Yonhap